Дөнья чемпионы Радик Сәлахов туган авылы Сармашбашта сайлады

Бүген, 20 сентябрьдә, тугызынчы чакырылыш Дәүләт Думасына депутатлар сайлауда өч көнлек тавыш бирү тәмамлана. Бу җылы көзге көннәрдә республикада һәм районда яшәүчеләрнең күбесе гражданлык бурычларын үтәп кенә калмады, туган якларына да барып кайтырга сәбәп тапты. Билбау көрәше буенча күп тапкырлар Татарстан, Россия һәм дөнья чемпионы, Сабантуйларның абсолют батыры Радик Сәлахов та гражданлык бурычын туган авылында үтәде.

Сайлауга гаилә белән

Ул үзенең туган авылы Зәй районының Сармашбаш авылына хатыны белән тавыш бирергә килгән.

— Мин һәрвакыт сайлауларга йөрим, битараф калмыйм.  Моны минем гражданлык бурычым дип саныйм. Ә тагын минем өчен мондый җылы көзге көннәрдә туган авылыма кайтып якыннарым белән булу да  бик әйбәт мөмкинлек, - дип елмайды Радик Сәлахов.

Радик Сәлахов — көрәшчеләр династиясеннән

 Аның әтисе, Сирен Хәмитович, ике көрәшче ул тәрбияләп үстергән кеше.

 Радик Сармашбашта туып үскән, мәктәпне шунда тәмамлаган. Аннары Түбән Камада укый, Зәйдә эшли, соңрак Әлмәткә күчеп, җирле көрәш командасының лидерларының берсе була. Бүген ул Чаллыда яши, әмма, үз сүзләре буенча, тамырларын онытмый һәм туган авылына даими кайтып йөри, Зәй данын даими төстә күркәм чыгышлары белән яклый. 

Сентябрьдә Бишкекта үткән күчмә халыкларның Бөтендөнья уеннарында Сәлахов көрәш буенча абсолют авырлык категориясендә алтын медаль яулады. Бу инде Сәлаховның күчмә халыклар уеннарында икенче тапкыр җиңүе. Карьерасында ул җиде тапкыр Татарстан чемпионы, өч тапкыр Россия чемпионы, өч тапкыр дөнья чемпионы, шулай ук ике тапкыр Федераль Сабантуй батыры булды. 

• Исегезгә төшерәбез, Дәүләт Думасына депутатлар сайлауда тавыш бирү Татарстанда өч көн — 18-20 сентябрь көннәрендә уза. Сайлау участоклары 8:00 дән 20:00 гә кадәр эшли. Һәр тавыш бирүче “бөтен гаиләсе белән сайлауларга" истәлекле беләзек ала.