Зәйдә федераль эзләүдә булган, хезмәт урыныннан качып киткән ике ир-атны тоткарлаганнар

Район эчке эшләр бүлегендә узган атнада ике мошенниклык очрагы теркәлгән.

20 майда бүлеккә Зәйдә яшәүче 44 яшьлек хатын-кыз мөрәҗәгать итә. Билгесез кеше аның паспорт мәгълүматларын кулланып, бер банкта 150 мең сумлык кредит рәсмиләштергән.

21 майда 42 яшьлек хатын-кыздан гариза керә. Билгесез кеше аның “Валдбериз” кабинетын ватып, 23500 сумлык рассрочка рәсмиләштергән.

“Мошенниклык факты буенча җинаять эше кузгатылды,  әлеге җинаятьне кылучыны ачыклау буенча оператив-техник чаралар үткәрелә”, – дип хәбәр итәләр полиция хезмәткәрләре.

Шулай ук узган атнада федераль эзләүдә булган ике граждан кулга алынган. Район эчке эшләр бүлегендә билгеләп үтүләренчә, алар хезмәт урынын үз белдеге буенча калдыруда гаепләнә.