Саулыкны кайгыртып

Сәламәтлек саклау өлкәсендә кичә «Республика медицина профилактикасы һәм җәмәгатьчелек сәламәтлеге үзәге» учреждениесе «Сәламәтлек мәктәбе» проекты кысаларында артериаль гипертония диагнозы куелучылар, йөрәк-кан тамырлары авыруларыннан интегүчеләр өчен физик күнегүләр темасы буенча онлайн укулар оештырды. Аны инструктор Ксения Гоглева алып барды. 

Әлеге укуларга Зәй үзәк дәваханәсенең терапия бүлегендә дәваланучылар да кушылды. Алар тиешле дәрәҗәдә физик күнегүләр башкаруны көндәлек гадәткә әйләндерүнең организм өчен бик файдалы булуын, кайсы күнегүләрне ничек ясарга кирәклеген белделәр. Укулардан соң күмәк рәвештә җиңел формада аларны кабатлап карадылар.