Яллар күңелле, имин үтсен дисәк...

Яңа ел каникуллары да җитте. Еш кына бу чорда район үзәк дәваханәсенең авыруларны кабул итү бүлегенә аяк-кулларын имгәтеп, югары температура, агулану билгеләре белән мөрәҗәгать итүчеләр арта. Баш табиб Айдар Фатыйхов зәйлеләргә бу чорда үз сәламәтлегеңне ничек сакларга кирәклеге турында киңәшләрен бирә.

Яңа ел бәйрәмнәре — ашказаны өчен сынау

Яңа ел төне, аннан соң да озакка сузылган яллар — ашказаны өчен зур сынау. Кызганыч, бәйрәмнәрдән соң ашказаны, йөрәк-кан тамыры авырулары белән, агуланып дәваханәгә мөрәҗәгать итүчеләр саны арта. Бәйрәм арасында спиртлы эчемлекләр кулланучылар да күбәя. Аракы йөрәккә дә начар тәэсир итә.

-Шуны истә тотарга кирәк: алкоголь, татлы, майлы, ысланган һәм тозлы ризыклар куллану азык-төлек контролен көчсезләндерә һәм боза. Көчле авырту һәм агулану билгеләре булганда табибка мөрәҗәгать итәргә кирәк, — ди Айдар Фатыйхов.

Физик активлык

Чаңгыда, тимераякта шуу, чана шуу — болар барысы да яхшы, әмма һәрчак акыл белән ял итә белергә кирәк. Алкоголь кулланучылар ситуацияне контрольдә тота алмый. Балаларны күмәкләп таудан шуа торган урынга алып барсагыз, контрольдә тотыгыз.

-Тюбингларда шуганда сак булыгыз. Алар кышкы уеннар өчен иң куркынычы дип санала. Ял итү өчен куркынычсыз урыннарны сайларга, балаларны күзәтергә, игътибарлы булырга киңәш итәм, — ди табиб.

Кышкы аяк киеме тайса, төрле имгәнүләр булырга мөмкин. Аяк астына карамыйча, телефонга алданып бару да җәрәхәтләр алуга китерә.

— Бәйрәм көннәрендә ашыгыч ярдәм хезмәте һәм кабул итү бүлмәсе ял көннәрсез эшли, билгеле бер көннәрдә дежур табиблар кабул итә, — ди Айдар Мөхәммәтнурович.

Травма алган очракта ул үз-үзеңне дәвалау белән шөгыльләнмичә, ашыгыч ярдәм хезмәткәрләрен чакыртырга киңәш итә.