Февраль — талпан энцефалитына каршы вакцинация өчен иң яхшы вакыт

Талпаннар кышкы йокыдан иртә язда уяна, шуңа күрә инде март — апрельдә аларны табигатьтә очратуга әзер булырга кирәк.
Талпаннар йөртә торган барлык авырулардан прививкалар әлегә эшләнмәгән, әмма иң куркынычы — талпан энцефалитыннан прививка ясатырга мөмкин һәм кирәк тә, диләр белгечләр.

«Талпан энцефалитыннан вакцинациянең тулы курсы өчен ай ярым вакыт кирәк. Шуңа күрә яңа сезонга алдан әзерләнергә кирәк. Февраль — вакцинация башлау өчен оптималь вакыт. Беренче чиратта һөнәре белән бәйле рәвештә, хәвеф-хәтәр төркемнәрендәге затлар мәҗбүри вакцинацияләнергә тиеш. Болар талпаннар белән контактта булу куркынычы зур булган эшләр башкаручыларга кагыла, ул агач әзерләү, авыл хуҗалыгы һәм гидромелиорация эшләре, экспедицияләр, урманны чистарту һәм төзекләндерү, талпаннар күп булган урыннарны эшкәртүчеләр һ.б. Зәй районы территориясе Россия Федерациясе субъектларының вируслы талпан энцефалиты буенча эндемик административ территорияләре исемлегенә кертелгән. Вакцинация ике тапкыр үткәрелә, беренче һәм икенче прививкалар арасында минималь интервал бер ай булырга тиеш. Вакцинациядән соң иммунитет булдыру өчен кимендә ике атна кирәк, шуңа күрә прививка ясату курсын (ике прививка) имин булмаган территориягә китәргә 2 атнадан да соңга калмыйча тәмамларга кирәк. Талпан вируслы энцефалитына каршы иммунитетны хуплау өчен бер елдан ревакцинация ясарга кирәк. Аннан соңгы ревакцинацияләр 3 ел саен үткәрелә», — ди Роспотребнадзорның Зәй бүлеге җитәкчесе Ринат Насыйбуллин.

Бу контингентларга вакцинация медицина оешмаларында бушлай үткәрелә. 2025 елда талпан вируслы энцефалитына каршы иммунизациягә 15173 кеше планлаштырылган (вакцинация — 6465, ревакцинация-8708).