Зәй кызы Арина Токранова - “Җәлил укулары” V Халыкара әдәби бәйгесе җиңүчесе

“Җәлил укулары” V Халыкара әдәби бәйгесендә "Алтынчәч" балалар бакчасы мәктәпкә әзерлек төркеменә йөрүче Арина Токранова "Җәлил дөнья халыклары телләрендә" номинациясендә икенче урын алды. Ул Муса Җәлилнең "Кызыма" шигырен рус, татар, инглиз телләрендә сөйләде. Аринаны бәйгегә педагоглары - тәрбиячеләр Рания Уразайкина белән Гөлфия Тимофеева әзерләде. Бәйге өч этаптан тора.

1нче этап – 2022 елның 6 ноябреннән 17 ноябренә кадәр сайлап алу этабы: оештыру комитеты тәкъдим ителгән материалларның әлеге нигезләмәгә туры килү-килмәвенә беренчел бәя биргән (дистанцион);

2нче этап – 2022 елның 18 ноябреннән 6 декабренә кадәр жюри катнашучыларның эшен бәяләү критерийлары буенча бәяләгән һәм конкурс финалистлары билгеләнгән (дистанцион рәвештә);

3нче этап – финал: 2022 елның 12 декабреннән 16 декабренә кадәр жюри әгъзалары белән берлектә оештыру комитеты тарафыннан конкурсантларның видеоязмалары онлайн-режимда каралган һәм критерийлар нигезендә бәяләнгән. Максималь балл җыйган өч финалист конкурсның җиңүчеләре булган. Аларга һәр номинациядә һәм яшь категориясендә беренче, икенче һәм өченче урыннар бирелгән.

40 мең кеше арасыннан 836 финалист сайланды, шул 836 арасыннан 115 җиңүче билгеләнде. Арина Токранова лаеклы икенче урынга чыкты.

Короновирус инфекциясе таралуын булдырмау, шулай ук халыкның тормышын һәм сәламәтлеген тәэмин итү максатларында бәйге дистанцион форматта уздырыла. Бәйге ел саен сөйләм үсеше һәм нәфис сүз белән кызыксыну, шигъри сүзнең матурлыгын һәм аһәңен тоя белү максатыннан үткәрелә. Бәйгенең бурычлар булып Россия төбәкләрендә һәм чит илләрдә татар телен һәм мәдәниятен саклауда, үстерүдә ярдәм итү; Муса Җәлилнең иҗади мирасын популярлаштыру; фронтовик язучылар иҗатына кызыксынуны арттыру; яшь буынны халык традицияләренә җәлеп итү; иҗади үсеш өчен шартлар булдыру; сәнгатьле уку осталыгын камилләштерүдә укучыларга шартлар тудыру; әдәби иҗатка сәләте булган яшьләрне барлау, таныту һәм сәләтләрен үстерү; әдәби-шигъри әсәрләргә карата уңай эмоциональ мөнәсәбәт тәрбияләү тора. Муса Җәлилнең тормышына һәм иҗатына багышланган музейларны һәм экспозицияләрне барлау, аңа багышланган һәйкәлләрне, бюстларны һәм мемориаль такталарны барлау да бәйгенең бер максаты. Бәйгене “Бөтендөнья татар конгрессы” Регионара иҗтимагый оешмасы, Татарстан Мәгариф һәм фән министрлыгы, Татарстан Мәдәният министрлыгы, “Татмедиа” Республика матбугат һәм массакүләм коммуникацияләр агентлыгы, “Татарстан – Яңа гасыр” Телерадиокомпаниясе, Татарстан Милли китапханәсе, Татарстан Язучылар берлеге, Татарстан Милли музее вәкилләреннән, мәдәният һәм сәнгать эшлеклеләреннән, татар теле һәм әдәбияты укытучыларыннан торган комитет оештыра.

Арина Токранова февраль аенда Казан шәһәрендә узачак бүләкләү тантанасына барачак. Анда зур бүләкләү чарасы булыр дип көтелә!

Фото "Алтынчәч" балалар бакчасыннан