Зәйдә хәрби гаиләсендә яңа туган балага 100 мең сумлык сертификат тапшырылды

Ватаныбыз сагында торучы Зәй хәрбие һәм аның тормыш иптәше Аделина Васильевлар гаиләсендә шатлыклы вакыйга — кызлары туды.

Бүген педагогик-психологик үзәктә гаиләне бала тууы белән район башлыгы Разиф Кәримов котлап, 100 мең сумлык сертификат тапшырды. Тантанада  ялга кайткан хәрбиләр, район җитәкчелеге, волонтерлар  катнашты.

- Сезне гаиләгездәге иң мөһим вакыйга - кызыгыз тууы белән котлыйм.  Бәхетле бала булсын, сезгә  ныклы сәламәтлек, иминлек, әтиегезнең исән-сау җиңү белән кайтуын телим, - диде чыгышында Разиф Галиевич.

Әти кеше бүгенге көндә алгы сызыкта илебез азатлыгы өчен көрәшә. Гаиләдә тагын бер кыз үсә:  Марияга 1 яшь тә  10 ай. Мария да очрашуда район башлыгы кулыннан бүләк алды.

-Безнең кызыбыз 22 августта  туды. Аңа Дарья дип исем куштык. Кызыбыз тууын иремә хәбәр иткәч, ул сөенеченнән елады. Әлбәттә, әтиебезнең безнең янга тизрәк җиңү белән исән-сау әйләнеп кайтуын телибез, - ди яшь әни.