Яшь зәйлеләр республика балалар сәнгать фестивалендә катнаштылар.
Июль аенда Зәй балалар сәнгать мәктәбендә «Минем әти – Герой» республика балалар сәнгать фестиваленең район этабы узды. Биш укучы талантлы педагоглар җитәкчелегендә махсус хәрби операциядә катнашкан әтиләренең портретларын ясадылар. Һәр бала рәсемгә үз күңеленең бер өлешен салды, портретларда тышкы кыяфәтне генә түгел, ә әтиләренең рухи җылылыгын һәм көчен күрсәтергә тырышты.
Зәйдә проектта 7-17 яшьлек балалар катнашты. Дәресләр балалар сәнгать мәктәбендә узды, анда педагоглар фестивальне оештыручылар тарафыннан тәкъдим ителгән махсус автор видео дәресләрен кулланып, балаларга рәсем сәнгатенең төрле техникаларын үзләштерергә булыштылар.
– Проектта әтиләре махсус хәрби операциядә катнашучы гаиләләрдән биш бала катнашты. Инициативаны ике педагог, профессиональ рәссам Венера Васильева һәм Елена Дмитриева хуплады. Алар җибәрелгән материаллардан илһам алып, балалар белән бергә лаеклы эшләр башкара алдылар. Балалар әтиләренең портретларын бик теләп ясадылар, - ди Зәй балалар сәнгать мәктәбе директоры Эльмира Вдовина.
"Минем әти – Герой” республика фестивале ТР Мәдәният министрлыгы, ТР Яшьләр эшләре министрлыгы, “Бердәм Россия” партиясенең Татарстан төбәк бүлеге, “Беренчеләр хәрәкәте” һәм “Ватанны саклаучылар” фондының төбәк филиалы ярдәмендә тормышка ашырыла. Инициатива үсеп килүче буынны патриотик тәрбияләүгә юнәлдерелгән.
Район этаплары йомгаклары буенча оештыру комитеты үзәк экспозиция төзү өчен иң яхшы һәм иң күңелгә үтеп керә торган 50 эшне сайлап алачак. Күргәзмәне ачу тантанасы 2026 елның сентябрь аеның беренче декадасына Татарстан Республикасы Милли китапханәсендә планлаштырылган.
Нет комментариев