Зәйдә хәрби гаиләсендә яңа туган балага 100 мең сумлык сертификат тапшырылды

Ватаныбыз сагына контракт буенча баскан Зәй хәрбие Александр һәм аның тормыш иптәше Ольга Петровна гаиләсендә шатлыклы вакыйга — кызлары туды.

Бүген педагогик-психологик үзәктә гаиләне бала тууы белән район башлыгы Разиф Кәримов котлап, 100 мең сумлык сертификат тапшырды. Тантанада ялга кайткан хәрбиләр, район җитәкчелеге, волонтерлар катнашты.

- Сезне гаиләгездәге иң мөһим вакыйга - бала тууы белән котлыйм. Бәхетле бала булсын, сезгә ныклы сәламәтлек, иминлек, әтиегезнең исән-сау җиңү белән кайтуын телим, - диде район башлыгы Разиф Кәримов.

«Незнайка» позывнойлы хәрби ике елдан артык Ватаныбыз азатлыгы өчен көрәшә. Кызы тугач, ялга кайтып, аларны бала тудыру йортыннан каршы алган.

-Безнең кызыбыз 12 августта туды. Аңа Аглая дип исем куштык. Исемне ирем белән бергә сайладык. Әлбәттә, әтиебезнең безнең янга тизрәк җиңү белән исән-сау әйләнеп кайтуын телибез, - диде яшь әни.