Татарстанның икътисад министры Зәйдә икътисади зона һәм предприятиеләр эшен бәяләде

Сәфәр барышында ул муниципалитетның төп инвестицион мәйданчыклары эше белән танышты һәм җирле предприятиеләр җитәкчеләре катнашында киңәшмә уздырды.

Махсус икътисад зонасы эшчәнлеге белән танышу

Зәй районы башлыгы Разиф Кәримов, башкарма комитет җитәкчесе Эмиль Галеев һәм профильле белгечләр озатуында министр 2025 елда Зәй районында оештырылган махсус икътисади зонасында булды. Кунакларга территориянең агымдагы торышын һәм аның үсеш перспективаларын тәкъдим иттеләр, шулай ук гамәлдәге резидентларның эшчәнлеге белән таныштырдылар.

Министр Мидхәт Шаһиәхмәтовны махсус икътисади зона эше белән таныштыралар

Районның социаль-икътисади үсеше - игътибар үзәгендә

Эш программасының икенче өлеше Зәй районы предприятиеләренең тотрыклы эшенә багышланган Мидхәт Шаһиәхмәтов рәислегендәге эш төркеме утырышы булды.

Игътибар үзәгендә социаль-икътисади үсешнең актуаль мәсьәләләре: инвестицион климат, эшмәкәрләргә ярдәм чаралары һәм әһәмиятле проектларны гамәлгә ашыру торды.

Разиф Кәримов предприятиеләрнең өзлексез эшләвен тәэмин итү һәм системалы проблемаларны ачыклау буенча күрелә торган чаралар турында сөйләде.

- Район икътисады сәнәгать һәм авыл хуҗалыгы җитештерүенә нигезләнә. Районның сәнәгать җитештерүе түбәндәге тармаклардан тора: электр энергетикасы (ГРЭС), автомобиль төзелеше («Аккурайд Уилз Руссиа» ҖЧШ), азык-төлек һәм эшкәртү сәнәгате («Зәй крекеры» ҖЧШ, «Зәй шикәре» АҖ), минераль җылылык һәм тавышны изоляцияләү материаллары җитештерү ("ТЕХНО заводы" филиалы), төзелеш индустриясе предприятиеләре («Зәй керамзиты» ҖЧШ). Авыл хуҗалыгы үсемлекчелек тармагына йөз тота. Районда “Зәй шикәре”, «Восток», «Зәй» агрофирмалары, «Зәй элеваторы» ҖЧШ, икмәк кабул итү предприятиесендә эре авыл хуҗалыгы җитештерүчеләре эшли. Район икътисадының нигезен сәнәгать тәшкил итә, шул исәптән эшкәртү тармаклары – 35, энергетика – 21, нефть чыгару – 32 процент, - дип билгеләп үтте район башлыгы чыгышында.

Район башлыгы Разиф Кәримов Зәйнең икътисад тармагы эшчәнлеге хакында сөйли

Муниципалитет җитәкчесе сүзләренә караганда, Зәй шәһәре алга киткән сәнәгать үзәкләре – Яр Чаллы, Түбән Кама һәм Әлмәт белән янәшәдә урнашкан, бу сәнәгать үсеше өчен уңай шартлар тудыра.

Предприятиеләрдәге агымдагы икътисади вазгыять турында утырышта катнашучыларга Зәй ГРЭСы җитәкчесе Дмитрий Прохоров, «Аккурайд Уилз Руссиа» ҖЧШ җитәкчесе Екатерина Мизрина һәм «Техно заводы» ҖЧШ филиалы җитәкчесе Андрей Мамонтов сөйләделәр.

Кече бизнес: үсеш динамикасы

Аерым блок кече эшмәкәрлекнең нәтиҗәлелеге турында фикер алышу булды. Разиф Кәримов ассызыклаганча, Зәй районында кече бизнесның нәтиҗәле эшчәнлеге конкурентлык мохитен формалаштыруга, базарны киң спектрдагы товарлар һәм хезмәтләр белән баетуга, халыкның тормыш дәрәҗәсен һәм сыйфатын тәэмин итүгә ярдәм итә торган тагын да әһәмиятлерәк факторга әверелә бара. 2025 елда районның 10 мең кешесенә 287,1 кече һәм урта эшмәкәрлек субъекты туры килгән, алдагы ел белән чагыштырганда 3,4 процентка үсеш күзәтелә. Зәй районы территориясендә барлыгы 6000 кече эшмәкәрлек субъекты теркәлгән, шул исәптән 292 кече һәм микропредприятие, 1 138 шәхси эшмәкәр һәм 4 570 үзмәшгуль кеше. Тармак структурасы буенча төп позицияләрне күпләп-ваклап сату һәм йөк ташу алып тора. Районның кече бизнес вәкилләре төбәк һәм федераль ярдәм чараларыннан актив файдалана.

Йомгаклар һәм карарлар

Утырыш тәмамлангач, катнашучылар алдына предприятиеләрнең тотрыклылыгына йогынты ясый торган рискларны системалы анализлау, шулай ук планлы икътисади күрсәткечләрнең үтәлешенә күзәтчелекне көчәйтү бурычлары куелды, шул исәптән баланс комиссияләре кысаларында да. Район җитәкчелегенә һәм профильле министрлыкларга предприятиеләргә куелган максатларга ирешүдә тиешле ярдәм күрсәтергә тәкъдим ителде. Министр билгеләп үткәнчә, бары тик системалы, җайга салынган һәм көндәлек эш кенә Зәй икътисади объектларының тотрыклы эшен саклап калырга мөмкинлек бирәчәк.