Хөрмәтле Разиф Галиевич!

Районыбызга җитәкче итеп билгеләнеп эшли башлаган тәүге көннәрдән алып Сез авыл хуҗалыгы тармагы үсешенә зур өлеш керттегез, җир эшендә намуслы хезмәт куючыларны хөрмәтләүгә игътибар бирдегез һәм бүген дә аграрийларга Сез биргән бәяләмә иң югары дәрәҗәдә кабул ителә. Менә шулай Сезнең белән бергә бер максатка йөз тотып, тынгысыз һәм көйле эшебез нәтиҗәсендә районда уңайсыз һава торышы шартларында да яхшы гына уңыш үстерелә. Район авыл хуҗалыгы тармагында мөһим урын тотучы шикәр чөгендерен җыю яхшы темплар белән бара.

Ел саен милли бәйрәмебез Сабантуенда кырда, терлекчелек тармагында хезмәт куючыларны зурлап хөрмәтләү Сезнең башлангыч белән гамәлгә керде. Ә бу исә үз чиратында аграрийларны тырыш хезмәткә стимуллаштыруга зур этәргеч булды. Авыл хуҗалыгы тармагын яхшы белүегез нәтиҗәсендә районда үсемлекчелек моңа кадәр ирешмәгән югарылыкларга иреште.

Тырыш хезмәтегез белән зәйлеләр табынын мул итәргә омтылуыгыз, намуслы эшчеләргә һәрчак югары бәя бирүегез өчен зур рәхмәт Сезгә, Разиф Галиевич! Район икътисадының тотрыклы булуы, төрле объектлар барлыкка килү, юлларыбызның заманча төзекләндерелүе — Сезнең тынгысыз хезмәт җимешегез. Сез, чын мәгънәсендә, Зәебезне чәчәк аттырдыгыз.

Разиф Галиевич, юбилеегыз мөбарәк булсын, сау-сәламәт, гаилә бәхетендә яшәвегезне телибез. Үз кулларыгыз белән Зәебездә барлыкка килгән яхшы күренешләр куаныч китерсен.

Ихтирам белән «Восток», «Зәй», «Зәй шикәре»
агрофирмалары хезмәт коллективлары.