Зәй укучылары белән «Яшүсмер. Тормыш рәвеше – сәламәтлек» дигән актуаль темага сөйләштеләр

Чарада  шәһәрнең 4нче мәктәбенең VII Б сыйныфы укучылары катнашты. Очрашу китапханәдә ун елдан артык эшләүче «Кеше. Закон. Хакыйкать» клубы кысаларында узды.

Диалог башында китапханәче Зөлфия Гыйльманова сәламәтлекнең күп очракта кешенең үзеннән торуын ассызыклады. Ул кечкенәдән үк сәламәт гадәтләр формалаштыруның мөһимлеген билгеләп үтте. Аннан әңгәмә көн тәртибе, дөрес туклану, сәламәт йокы һәм спорт белән шөгыльләнү турында барды. Ачыкланганча, бу сыйныфта  укучыларның күбесе спортның каратэ, гимнастика, йөзү һәм көрәш төре белән актив шөгыльләнә. Алар республика һәм бөтенроссия ярышларында җиңүләр яулаганнар.

Мәктәп укучылары уеннарда һәм конкурсларда энтузиазм белән катнаштылар. Алар белән «Көн тәртибе турында табышмаклар», «Анаграмма» һәм «Без сәламәт тормыш рәвешен сайлыйбыз» викторинасы уздырылды. Бигрәк тә «Зыянлы продуктларга антиреклама» конкурсы кызыклы булды, анда катнашучылар чипсы, тиз әзерләнә торган токмач ашлары һәм тозлы печеньеларга каршы реклама роликлары уйлап таптылар һәм тәкъдим иттеләр. Шулай ук алар файдалы продуктлар рекламасы өчен үз идеяләрен уйлап таптылар.

Чара ахырында балалар бертавыштан сәламәтлек  кеше тормышындагы иң кыйммәтле әйбер дигән нәтиҗәгә килделәр. 

Фотолар китапханәдән.