Зәйнең тагын берничә мәктәбендә «Үсеш ноктасы» белем бирү үзәкләре ачылачак

«Мәгариф» илкүләм проектының «Заманча мәктәп» федераль проекты кысаларында агымдагы елның 1 сентябрендә Зәй муниципаль районының Поручик, Бохарай һәм Александр Бистәсе төп гомуми белем бирү мәктәпләре базасында «Үсеш ноктасы» табигый-фәнни һәм технологик юнәлештәге белем бирү үзәкләре ачылачак.

Соңгы айда әлеге мәктәпләргә заманча җиһазлар кайтарылды. Болар — химик реактивлар комплектлары, электрон микроскоплар, киңәйтелгән робототехник җыелмалар һәм башка җиһазлар.

«Мәктәпләрнең матди-техник базасын ныгыту укучыларның белем сыйфатын яхшыртуга ярдәм итәчәк, укучыларның физика, биология һәм химия фәннәре буенча потенциалын ачачак, белем бирүнең цифрлы, табигый-фәнни һәм техник профиленә кызыксынуны үстерәчәк», — ди авыл мәктәпләре директорлары.

Яңа уку елында мәгариф үзәкләре базасында робот техникасы һәм программалаштыру түгәрәкләре эшләячәк.

Зәй муниципаль районында «Мәгариф» илкүләм проекты кысаларында бүгенге көндә 11 «Үсеш ноктасы» үзәге эшли.