Зәйдә көчле рухлылар ункөнлеге старт алды

Декада кысаларында мөмкинлекләре чикле кешеләр өчен төрле чаралар оештырыла, аларга карата игътибар арта. Ункөнлек җәмгыятебезгә янәдән аларга даими игътибар бирү, социаль яклау кирәклеге турында искәртә. Бу көннәрдә аларга игътибар чыннан да арта. Төрле күңел ачу чаралары, акцияләр уздырыла. 

Бүген “Радость” социаль хезмәтләр күрсәтү үзәгендә инвалидар ункөнлеген тантаналы төстә ачтылар. Чарада район башлыгы Разиф Кәримов, хәйриячеләр, махсус хәрби операция ветераннары катнашты.

Чара башланганчы алар икенче катта 9нчы мәктәп, “Радость” үзәгенең көндезге бүлегенә йөрүчеләр эшләреннән торган күргәзмә белән таныштылар. “Тату гаилә” балалары матур чыгышлары белән сөендерделәр. Алар район башлыгы кулыннан бүләк тә алды.

Бүгенге көндә районда 3056 сәламәтлеге чикле өлкән яшьтәге кеше, 176  бала исәпләнә. 

-Инвалидлар декадасы – ул ниндидер вакыйга түгел, ә авырлыкларга карамастан тулы тормыш белән яшәвегез, куйган максатларга ирешүегез, безгә үрнәк булуыгыз өчен сезгә хөрмәтебезне  белдерү дә. Сәламәтлек буенча мөмкинлекләре чикләнгән кешеләр үзләренең күңел көче һәм ныклыгы белән кыенлыкларны җиңеп булуын раслыйлар. Сезнең киләчәккә ышанып, һәрчак алга омтылып яшәвегез – безнең барыбыз өчен дә зур үрнәк. Районда уңайлы мохит булдыру буенча күп эшләр башкарыла, - диде чыгышында Разиф Галиевич. 

Районда инвалидларны социаль яклауның ташламалы чаралары тәкъдим ителә, шул исәптән бушлай дарулар белән тәэмин итү, санаторий-курорт дәвалануы, коммуналь хезмәтләр һәм транспорт өчен түләүләрне компенсацияләү.

Районда инвалидларга ярдәм итү өчен социаль учреждениеләр эшли. "Радость" халыкка социаль хезмәтләр күрсәтү үзәгендә инвалидларга комплекслы ярдәм күрсәтү өчен шартлар тудырылган. Биредә когнитив тайпылышлары булган кешеләр өчен көндезге бүлек, инвалид балалар өчен кыска вакытлы булу төркеме эшли, гаилә һәм ата-аналар клублары эшли, сәламәтлек мөмкинлекләре чикле балалар тәрбияләүче гаиләләргә ярдәм итүгә юнәлдерелгән берничә программа һәм технология тормышка ашырыла. Үз-үзенә хезмәт күрсәтү сәләтен югалткан кешеләр социаль хезмәткәр хезмәтләреннән файдалана. Шулай ук  хәрәкәтләнү мөмкинлеге чикле гражданнарның туганнары "Тәрбия мәктәбе"ндә авыру кешене дөрес итеп  тәрбияләргә өйрәнәләр.

Зәйдә реабилитация үзәгенең аналогы бар – бу  "Шатлык" социаль тернәкләндерү үзәге, анда кирәкле медицина ярдәме, педагогик һәм психологик ярдәм алырга мөмкин.

Мәдәният учреждениеләре инвалидларны социаль интеграцияләүгә юнәлдерелгән мәдәни-массакүләм чараларны даими  уздыра. Бу иҗат фестивальләре, спорт ярышлары, сәнгать эшләре күргәзмәләре һәм музыкаль концертлар, аларда әлеге категориядәге талантлы кешеләр катнаша.

Мөмкинлекләре чикләнгән балаларга аерым игътибар бирелә. Һәр балага, сәламәтлек торышына карамастан, сыйфатлы белем алу хокукы бар. Районда инклюзив белем бирүче, махсус җиһазландырылган бүлмәләре һәм төрле инвалидлык формалары булган балаларны укытуны тәэмин итәргә мөмкинлек бирүче укыту чаралары булган коррекция мәктәбе һәм «Тату гаилә» балалар бакчасы эшли. 

Мәшгульлек үзәге инвалид гражданнарга һөнәри белем алу һәм яңа һөнәргә өйрәнүдә ярдәм күрсәтә. Хезмәткәрләрнең индивидуаль үзенчәлекләрен исәпкә алып, эш урыннары булдырыла. 

Махсус хәрби операциядә катнашып, инвалидлык алучылар  белән эшләүгә аерым игътибар бирелә. Район тигез мөмкинлекләр территориясе булдырырга омтыла. Сәламәтлекләре буенча мөмкинлекләре чикләнгән кешеләрне кайгырту  район социаль сәясәтенең мөһим өлеше булып тора.

Шулай ук чарада хәйриячеләрне дә хөрмәтләделәр, алар район башлыгының Рәхмәт хаты белән бүләкләнделәр. 
Чарада катнашучылар  хөрмәтенә матур җырлар яңгырады.

1 декабрьдә «Бердәм Россия» сәяси партиясенең туган көне. Шул уңайдан  «Игелекле эшләр» акциясе уза. Инвалидлар декадасын ачу тантанасы да шул акция кысаларында узды.