Зәйнең Изге чишмә янында бүген Качману бәйрәме уңаеннан халык күп җыелды

Бүген, 19 гыйнварда, православие динен тотучылар Качману  бәйрәмен билгеләп үтәләр. Иске Зәй бистәсен урап үтү юлында урнашкан Изге чишмәсен изгеләндерү йоласын Зәй округы благочинные вазифаларын башкаручы  Родион атакай үтәде.

- Бүген без Качмануны  бәйрәм итәбез. Шуны онытмагыз: изге суны эчкәндә, купельгә чумганда без Аллаһының рәхмәте  белән кушылабыз.Аллаһыдан ул рәхмәтнең  шушы су өстенә иңүен  сорыйбыз. Шуңа күрә су эчкәндә  яки суга чумганда без ихтирамлы булырга тиеш, - дип мөрәҗәгать итте Родион атакай җыелганнарга.
Качману бәйрәме белән район башлыгы Разиф Кәримов тәбрикләде, ныклы сәламәтлек һәм тыныч күк йөзе теләде.
Традиция буенча, бу көнне күпләр православие ышанулары буенча аеруча игелекле көчкә ия булган изге суны җыярга яки купельдә символик коенырга  омтыла. 
Шәһәрдәшебез  Николай Кузнецовның туган көне нәкъ менә Качману көнендә икән, ул купельгә чумгач үз кичерешләре белән уртаклашты. 
- Бүген миңа 59 яшь тулды. Качмануда инде мин  30 елдан артык суга чумам. Бу иммунитетны арттыра, бүген менә су коенып чыктым – бу миңа  бер елга җитәрлек көч-куәт бирде, – дип сөйләде ул. 
Шәһәребездә билгеле тренер Анатолий Терентьев та соңгы 15 ел дәвамында Качмануда суга чума икән. 
- Бу йоланы башкаруга организмымны акрынлап күнектердем. Баштарак чиләкләргә су җыеп, өстемә су коя идем. Аннан соң изгеләндерелгән  суга тулысынча чума башладым. Хәзер минем өчен бу традиция. Суга чумарга алдан әзерләнеп тормыйм. Мондый көнне су җылы була. Качмануда суга чумганнан соң тойгылар әйтеп бетергесез, - ди ул. 
Халыкның иминлеген һәм уңайлылыгын тәэмин итү өчен урында ашыгыч хезмәтләр хезмәткәрләре: полиция, коткаручылар һәм медиклар кизү тора. Чумучылар өчен җылыту пунктлары әзер. Шунда ук зәйлеләргә тәмле коймак һәм кайнар чәй тәкъдим иттеләр, бу көннең рухи өлешенә күңелле өстәмә булды.