Зәй районында юл челтәре яңара

2026 елда Зәй муниципаль районында 17 километрдан артык юлны яңартыла, гомуми суммасы 327 млн сумнан артыграк. Планга 30га якын участок кертелгән - бу шәһәр урамнары, авыл юллары һәм социаль объектларга керү юллары.

Шәһәр урамнары: уңайлылык һәм куркынычсызлык

Шәһәрнең үзендә юл өслеген киң колач белән яңарталар. Ломоносов урамында 545 метр озынлыкта асфальт-бетон өслек тәртипкә китерелә. Мичурин урамында ремонтны халык мөрәҗәгате буенча үткәрделәр, бу - шәһәр халкының фикере төзекләндерү планнарына турыдан-туры йогынты ясау үрнәге. Шулай ук Күпер һәм Бакча урамнарында да эшләр бара (участокның гомуми озынлыгы — 383 метр).

Җәяүлеләр хәрәкәтенә аерым игътибар бирелә: Нефтьчеләр проспектында, район үзәк дәваханәсе белән 4нче мәктәп арасында, шулай ук стоматология поликлиникасы янында тротуарлар салына. Яңа тротуарлар - уңайлык кына түгел, ә куркынычсызлыкның мөһим элементы: алар җәяүлеләр һәм транспорт агымын аерырга һәм авария очраклары куркынычын киметергә ярдәм итә.

Авылларда дүрт торак пунктта юлларны яңарталар

Юлларны төзекләндерү, салу эшләре авыл җирлекләрендә дә актив бара. Аксар авылында берьюлы дүрт урам — Ленин, Мәктәп, Вахитов һәм Тукай урамнары юлы ремонтланды. Югары Шепкәдә Үзәк, Яшьләр  урамнары юлын яңарталар, мәктәпкә керү юлын төзекләндерәләр.

Сарсаз-Багражда программага Тукай, 1 Май, Вахитов, Оренбург урамнары кертелгән. Бохарайда Мәктәп, Ромашкино һәм Елга аръягы урамнарын ремонтлыйлар. Авыл халкы өчен мондый эшләр аеруча мөһим: яхшы юл өслеге —тормышның гомуми сыйфатын күтәрү.

Участокларда нәрсәләр эшләнә

Ремонт программасы — асфальт җәю генә түгел. Комплекста берьюлы берничә мәсьәләне хәл итәләр:

-яңа асфальт-бетон өслек салалар;

-тротуарларны төзекләндерәләр — 2 километрдан артык;

-Җиңү проспектында җәяүлеләр кичүенең проекциясен урнаштыралар: мондый билгеләр тәүлекнең караңгы вакытында яхшы күренә һәм өстәмә рәвештә машина йөртүчеләрнең игътибарын җәлеп итә;

-юл билгеләре һәм коймалар куялар.

Бу чараларның барысы да  уртак максатка эшли — юлларны максималь куркынычсыз итү. Сыйфатлы юл өслеге, төгәл билгеләр һәм җәяүлеләр өчен уңайлы кичүләр юл-транспорт һәлакәте куркынычын киметә һәм машина йөртүчеләр өчен дә, җәяүлеләр өчен дә хәрәкәт итүне уңайлы итә.

Шулай итеп, Зәй районында 2026 елгы юл сезоны — асфальтны яңарту гына түгел, ә транспорт инфраструктурасын яхшырту һәм юлларда куркынычсызлыкны арттыру буенча комплекслы эш.