Соңгы елда электрон хезмәт кенәгәсенә өстенлек бирүчеләр саны 15 процентка арткан. Хәзерге вакытта бу форматтан 400 меңнән артык татарстанлы файдалана.
Электрон хезмәт кенәгәсен рәсмиләштерү тәртибе
Электрон форматка күчү өчен эш бирүчегә язма гариза бирү дә җитә. Шуннан соң Татарстан Республикасы буенча Социаль фонд бүлеге мәгълүматны цифрлы форматка күчерә. Электрон хезмәт кенәгәсе — традицион кәгазь документның цифрлы аналогы. Россия Социаль фондының мәгълүмат системасында хезмәт чорлары, эш урынын алмаштыру, эштән азат итү һәм башка кадровик вакыйгалар турындагы барлык мәгълүмат саклана.
Электрон хезмәт кенәгәсенең уңай яклары
Бу форматның берничә мөһим өстенлеге бар:
• Мөмкинлек. Хезмәткәр «Дәүләт хезмәтләре» порталы аша теләсә кайсы вакытта, эш бирүчегә мөрәҗәгать итмичә, үз стажы турында мәгълүмат ала ала.
• Ышанычлылык. Мәгълүмат яклаулы базада саклана — документны югалту яки бозу куркынычын киметә.
• Эшкә урнашканда уңайлылык. Кәгазь хезмәт кенәгәсен тапшыру таләп ителми: эш бирүче мәгълүматны турыдан туры СФР системасыннан ала.
• Контроль һәм төгәллек. Хезмәткәр теләсә кайсы вакытта язмаларның дөреслеген тикшерә һәм төгәлсезлекләрне тиз арада ачыклый ала.
• Пенсия процедураларын гадиләштерү. Мәгълүматларны автоматлаштырып җыю пенсияне билгеләү вакытын кыскарта һәм стажны исәпләгәндә хаталар килеп чыгу куркынычын киметә.
Күчү кагыйдәләре һәм яңа хезмәткәрләр өчен үзенчәлекләр
Электрон хезмәт кенәгәсе Россиядә 2020 елдан кулланыла. Күчкәннән соң кәгазь формасы хезмәткәргә бирелә, ә алга таба барлык яңа мәгълүмат цифрлы форматта алып барыла.
2020 елның 31 декабреннән соң беренче тапкыр эшкә урнашучылар өчен кәгазь хезмәт кенәгәләре рәсмиләштерелми — стаж турындагы мәгълүмат баштан ук электрон рәвештә алып барыла. Бу кагыйдә каникулларда вакытлыча эшкә урнашучы яшүсмерләр өчен дә гамәлдә.
Эксперт фикере
«Электрон хезмәт кенәгәсе — киләчәккә ышанычлы адым. Ул хезмәткәр өчен дә, эш бирүче өчен дә уңайлы. Без республика халкының электрон форматка өстенлек бирүен күрәбез һәм аларның саны елдан ел арта. Димәк, кешеләр цифрлы сервисларның ышанычлылыгын, уңайлылыгын һәм гадилеген бәяли», — дип билгеләп үтте Татарстан Республикасы буенча Социаль фонд бүлеге идарәчесе Эдуард Вафин.
Нет комментариев