Зәйнең үзәк мәчете каршында балалар өчен рухи-сәламәтләндерү курслары уңышлы уза

Инде бер атна дәвамында  Зәйнең  Таҗетдин Ялчыгол исемендәге үзәк мәчетендә балалар өчен мәчет каршындагы рухи-сәламәтләндерү курслары эшли. Аларда  малай һәм кызлар  аерым төркемнәрдә ислам нигезләрен өйрәнә, иҗат белән шөгыльләнә, хәрәкәтчән уеннар уйныйлар. 

Курслар барышында “Энергия” стадионында футбол буенча иптәшләрчә матч та оештырылды. Тренер Ринат Бикмеев җитәкчелегендәге 2014 елгылардан төзелгән командага каршы мәчет каршындагы курсларга йөрүчеләрдән җыелган малайлар уйнады. Уен дустанә атмосферада узды, ә ахыр чиктә исәп тигез булып чыкты — чын дуслык җиңде.

Ә балалар өчен дәресләрне тәҗрибәле остазлар – Илдар хәзрәт, Динар хәзрәт һәм Резеда абыстай үткәрә. Алар балаларны дин нигезләренә өйрәтеп кенә калмыйлар, әхлакый сыйфатларны, дисциплинаны һәм үзара ярдәмләшүне үстерергә дә ярдәм итәләр. 

Таҗетдин Ялчыгол исемендәге мәчеттә уза торган курслар рухи мәгърифәтне актив ял белән берләштерә, бу  үсеп килүче буын өчен  файдалы да,  кызыклы да.

Роза Илалтдинова фотолары