Зәйнең төп мәчетендә хатын-кызлар ифтары узды

Традицион дини чараны ел саен район мөселман хатын-кызлары җәмгыяте оештыра. Җыелучыларны район Советының иҗтимагый оешмалар, массакүләм мәгълүмат чаралары һәм милләтара мөнәсәбәтләр бүлеге башлыгы Әминә Биккинина сәламләде. Кичке аш алдыннан Фатыйх хәзрәт Нуруллин рухи чистарыну турында вәгазь сөйләде, ә җыелганнар бергәләп  дога укыды.

“Без Аллаһы Тәгаләдән тынычлык, солдатларның тизрәк өйләренә кайтуын, һәр гаиләнең иминлеген сорадык", — дип уртаклашты мөселман хатын-кызлары җәмгыяте җитәкчесе Рәзилә Җиһаншина.

Дини чара кичке ашы белән тәмамланды: кунакларны токмач ашы, пылау, яшелчә һәм яңа пешкән камыр ризыклары белән сыйладылар.

фотолар үзәк мәчеттән