Зәй мөселманнары Корбан бәйрәмен билгеләп үтә

Шәһәребезнең Таҗетдин Ялчыгол исемендәге үзәк мәчетеннән иртәнге намазга чакырып яңгыраган азан аеруча күңелләргә үтеп керде. Мөселманнарның олысы-кечесе мәчеткә агылды. Иртәнге намаз башкарылгач, Коръән сурәләре, бәйрәм вәгазе укылды. Имам-мөхтәсиб, хаҗи Фатыйх хәзрәт Нуруллин вәгазендә корбан чалу кагыйдәләре турында бәян итеп, мөселманнарны малларын кызганмыйча, корбан чалырга чакырды. Аннан ул Татарстан мөселманнары Диния нәзарәте рәисе, мөфти Камил хәзрәт Сәмигуллинның котлавын ирештерде.

Гаеттә район башлыгы Разиф Кәримов шәхсән үзе катнашып, дини чарада катнашучыларны бәйрәм белән котлады, Корбан гаете йортларыбызга шатлык алып килсен, иртәгәсе көнгә ышаныч китерсен, дип тәбрикләү сүзләре җиткерде. Разиф Галиевич чыгышында булганына шөкерана кылырга чакырды, Татарстан Республикасы Рәисе Рөстәм Миңнехановның котлавын ирештерде, районда барган күркәм эш-гамәлләр турында да сөйләде, динара, милләтара дуслыкка чакырды. 

«Илебез шактый катлаулы сәяси чор кичерә, аның чикләрен саклаучы ир-егетләребез белән горурланабыз, аларга хәер-фатихада торабыз», — диде үз чыгышында район башлыгы.

Аннан соң мәчеткә җыелучылар бәйрәм намазын укыды. Гаеттән соң мөселманнар туганнары зиратын барлады, корбанга маллар чалды.