Рамазан аена керәбез

Район имам-мөхтәсибе Фатыйх хәзрәт Нуруллинның Рамазан ае уңаеннан мөрәҗәгатен тәкъдим итәбез.

“Рамазан ае –  ул мөселман кешесе өчен бик фазыйләтле айларның берсе. Рамазан аеның асылы – ураза тоту, ягъни иртәнге намаздан алып ахшам намазына кадәр ашау-эчүдән тыелып тору. Бу – тәне сәламәт, акылы төзек булган мөселманнарның Аллаһы каршындагы бурычлары. Моны Раббыбыз безгә Коръәндә әмер итте: «И, иман китерүчеләр! Сезгә кадәр булган өммәтләргә фарыз ителгән кебек, ураза тоту сезгә дә фарыз ителде. Бәлки сез тәкъва булырсыз» («Бәкара» сүрәсе, 183нче аять), – диде. Рамазан ае – юмартлык, игелекле гамәлләр ае да. Бу айның аермасы тагын шунда: күбрәк сәдака бирү, ризык өләшү, ифтар мәҗлесләре уздыру хәерле гамәлләрдән булып тора. Мөселманның максаты – күбрәк игелек кылу. Раббыбыз безгә динебезнең асылын аңлау бәхете бирсә иде. Һәрберебезгә аять-хәдисләр белән гамәл кылырга, ураза тотарга, Коръән укып, бу айны тулысынча игелектә үткәрү һәм юмарт булып, әҗер үлчәүләрен тутыру мөмкинлеге, тәүфыйк, калеб дөреслеге насыйп булсын.  Рамазан ае мөбарәк булсын”.