Зәйдә «Йөгерүче китап-2025» акциясе үтте

Менә 8 ел инде Россиядә бу масштаблы социомәдәни акция уздырыла. «Йөгереп йөрүче китап»ның төп бурычлары үзгәрешсез кала – китап укуны популярлаштыру һәм китапханәләргә яңа укучыларны җәлеп итү.

Сөббух Рәфыйков исемендәге үзәк китапханә дә бу акциягә кушылды. Акциядә катнашучылар китапханәчеләр алдан әзерләнгән маршрут буенча шәһәр урамнары буйлап уздылар. Алар үтеп баручыларга Бөек Ватан сугышы тарихы буенча белемнәрен тикшерү, сугыш турындагы әдәби әсәрләрне, Советлар Союзы Геройларын, геройларның исемнәрен искә төшерү өчен сораулар бирделәр.  Акциядә 4нче мәктәпнең VI Б сыйныфы укучылары, китапханә укучылары, пенсионерлар, зәйлеләр һәм кунаклар катнашты. Дөрес җаваплары өчен В. Степанов, Р. Хәмидуллин, мәктәп укучыларына «Алар җиңү белән кайттылар» китабы бүләк ителде. Китапта Зәй районында туып үскән, Икенче Бөтендөнья сугышы фронтларында катнашкан 5589 сугышчы турында мәгълүматлар тупланган.
   

 “Чара яшүсмерләрдә, өлкән буын кешеләрендә әхлакый-патриотик хисләрне ныгытуга, Бөек Ватан сугышы,  Җиңүнең нинди бәягә яулануы турында белемнәр формалаштыруга юнәлдерелгән иде”, - ди китапханәче Зөлфия Гыйльманова.

Фотолар китапханәдән.