Зәйдә Җиңүнең 81 еллыгы уңаеннан «Ветеранны котла” акциясе бара

Бөек Ватан сугышында Җиңүнең 81 еллыгы алдыннан Мирный микрорайоны активистлары «Ветеранны котла» акциясенә кушылды. Аны «Мирный» микрорайоны ТИҮ рәисе Гөлбану Галяминская, 5нче мәктәпнең директор киңәшчесе Наилә Ентальцева, укучылар һәм 7нче филиал китапханәчесе Эльвира Архипова белән берлектә оештырды.

Акциянең төп максаты – балачагы һәм яшьлеге авыр сугыш елларына туры килгән кешеләргә игътибар һәм кайгырту булды. Катнашучылар тыл хезмәтчәннәре Мәгъфуга Шәвәли кызы Ибнеева, Мария Трофимовна Винокурова, Гөлбаһирә Фәйзрахман кызы Гыйззәтуллина һәм Хәкимулла Мөхлис улы Мөхлисовта булдылар.

Укучылар ветераннарга хәрби тематикага шигырьләр әзерләделәр, шулай ук үз куллары белән ясалган открыткалар тапшырдылар. Кунаклар өлкән буын вәкилләренә ныклы сәламәтлек, иминлек һәм озын гомер теләделәр, хезмәтләре өчен чын күңелдән рәхмәт белдерделәр.

— Мондый акцияләрдә катнашу — ихтирам һәм рәхмәт белдерү, шулай ук халкыбызның батырлыгы истәлеген саклауга үз өлешеңне кертү мөмкинлеге ул, - диде Гөлбану Галәминская.

Мондый очрашулар яшьләрне патриотик тәрбияләүнең мөһим өлешенә әверелә, буыннар арасындагы бәйләнешне саклап калырга ярдәм итә.

фотолар «Мирный» микрорайоны үзидарәсеннән