Зәйдә Бөек Ватан сугышында һәлак булган Черновларга багышланган фильм күрсәтелде

Хәтер һәм кайгы көне уңаеннан Зәйнең туган як тарихын өйрәнү музеенда Константин Черновның «Солдат анасы һәм аның уллары турында» фильмының премьерасы булды. 

Бу фильм Югары Баграж авылыннан бертуган Черновларның язмышы турында. Бөек Ватан сугышына киткән алты улның берсе – кечесе Александрга гына туган якка кайту насыйп булган. Александр 1943 елның 9 ноябрендә - абыйсы Николай һәлак булган көнне Зәй хәрби комиссариаты тарафыннан мобилизацияләнә. Бары тик 1947 елның февралендә туган авылына кайта. Аның гаиләсендә биш бала үсә.

“Фильмның премьерасын Александр Черновның балалары һәм 1нче мәктәп яны лагерена йөрүчеләр карады. Соңыннан балалар фильмны алган тәэсирләре белән уртаклаштылар. Солдатның кызы Анна Александровна балачак хатирәләрен искә төшерде. Биш бала үскән зур йортта әти кешенең эштән кайтуын түземсезләнеп көтәләр. Кечкенә Аня аны юл буенда каршы ала торган була. Әтисенең эшләпәсен ул  ерактан ук күреп ала. Ә әтисе беркайчан да бу баш киеменнән аерылмаган”, - ди музейның өлкән фәнни хезмәткәре Светлана Долгова.

Очрашу ахырында чарада катнашучылар «1941-1945 елларда Ватан өчен һәлак булган Зәй уллары һәм кызлары» һәйкәленә чәчәкләр салдылар. 

Фотолар музейдан.