Минем герой — минем гаиләм

Һәр гаиләдә әлеге дәһшәтле еллар кайтавазы саклана. Батыр әби-бабайлары, туганнары турындагы истәлекләр белән редакциябезгә килеп уртаклашучылар бар. Аларның хатирәләре газетабыз битләрендә урын ала. Бу көннәрдә шундый якты истәлекләре белән шәһәрдәшебез Любовь Чугунова да уртаклашты. Ул безгә әнисе, фронтовик Валентина Полякова (Федоткина) тарихын сөйләде.

Полякова (Федоткина) Валентина Петровна 1924 елның 1 маенда Сарман районының Языково авылында туа. 7 сыйныф белем ала, аннан соң мәктәптә физкультура укытучысы булып эшли. Совет Армиясенә 1943 елда алына. Валентина Петровна 1нче Украина фронты составындагы 4нче зенит полкында хезмәт иткән. Полк Нежин тимер юл станциясен дошман авиациясе һөҗүмнәреннән саклый иде. Гаскәр алга киткән саен, зенит полкы да көнбатышка таба хәрәкәт итә. Алар башта алар Киев янында, аннары Житомир янында туктала, ә монда инде полкның бер өлеше, шул исәптән Валентина Петровна хезмәт иткән батарея да сугыш ахырына кадәр кала.

Ул 1945 елда демобилизацияләнә. Сугыштан соң дәүләт банкында 1976 елга кадәр (31 ел), аннары Зәй ГРЭС кунакханәсендә эшли. Күпьеллык хезмәте өчен хезмәт ветераны исеменә лаек була һәм Бөек Ватан сугышы юбилей медальләре белән бүләкләнә. Пенсиягә чыккач, Зәй районы ветераннар советы эшендә актив катнаша. Ул тормыш иптәше Иван Павлович белән озын һәм бәхетле гомер кичерә. Алар ике кыз һәм өч онык үстерәләр. Героик якташыбыз 1996 елның 26 ноябрендә вафат булды.

— Минем бабам Федоткин Петр Романович та Бөек Ватан сугышында катнашкан. Ул фронтка 1942 елның язында китә. Ул 1943 елның 26 мартында һәлак була һәм Ленинград өлкәсе Киров районы Вороново авылында туганнар каберлегендә җирләнә. Өйдә аның биш баласы һәм авырлы хатыны калган, — дип искә ала Любовь Ивановна.