Ихтыяр көче мәктәптән башлана

Югары Мәлем авылы мәктәбендә җылы һәм рухландыргыч очрашу булды: укучылар янына әлеге мәктәпне тәмамлаган Ләйсән Тихонова килде. Аның тормыш һәм спорт юлы - максатчанлыкның һәм рухи көчнең чын үрнәге.

Бүген Ләйсән Николаевна – Казанның «Акбарс» көрәш спорт мәктәбенең  спорт-массакүләм эш буенча директор урынбасары, сумо буенча Татарстан Республикасы судьялар коллегиясе рәисе, билбау көрәше буенча Россия спорт мастеры, Татарстанның физик культура һәм спорт отличнигы. Хәзер декрет ялында, туган мәктәбенә кайтып, укучылар белән аралашырга вакыт тапты.

Ләйсән Николаевна балалар белән холыкны чыныктыру һәм бирешмәскә өйрәнү турында сөйләште. Ул үзенең ныклы белем базасы биргән укытучылары турында аерым җылылык белән сөйләде һәм аның юлына җитди йогынты ясаган остазы Разин Абзаловка аерым рәхмәт белдерде. Укучылар тренировкалар һәм спорт чыныгуының төрле тормыш ситуацияләрендә ничек ярдәм итүе турындагы тарихларны кызыксынып тыңладылар.

Очрашу азагында Ләйсән Николаевна балаларга яхшы укуларын, тәртипле булуларын, куйган максатларына тугры булуларын теләде. Мондый очрашулар мәктәпне тәмамлаучылар  мәктәпнең төп горурлыгы булуын искә төшерә.

• Фотолар мәктәптән