Пәнәчелеләр Корбан бәйрәмен бергәләп уздырды

Ул көнне мәчетебез күпләгән халыкны үзендә туплады. Җыелган халык арасында балаларның һәм яшьләрнең күп булуы бик шатландырды. Бәйрәм намазы иртәнге 6:00 сәгатьтә вәгазьләрдән башланып китте. Намаздан чыккан халыкны, авылыбыз тарихында беренче тапкыр, урамда кайнар чәй һәм коймак белән өстәл әзерләп кызлар көтеп торалар иде инде. Авылыбызның оста пешекчесе Эльмира Шакирова тәмле коймаклар пешереп халыкны каршы алды. Аңа Гөлгенә Гәрәева, Рамилә Гыйззатуллина бик теләп ярдәм иттеләр. Шулай ук, килгән халык өчен бу көнне мәчетнең бер бүлмәсендә авыл тарихына кагылышлы музей ачылды.

Кич белән мәчет ишек алдында корбан итеннән Альберт Шакиров пылау пешереп җыелган халыкны сыйлады. Менә шундый изге күңелле авылдашларыбыз белән горурланабыз.

Дамирә Шәрифуллина
Югары Пәнәче авылы