Матурлыкка гашыйк Гөлнур

“Кулларыннан гөлләр тама, йөзендә ай нурлары”.  Имәнлебаш авылы кызы Гөлнур Гәрәева турында кебек әлеге сүзләр. Тәрәзә төбендәге гөлләре кышын да шау-чәчәктә утырып, җәй көннәрендә ишегалды аллы-гөлле чәчкәләргә күмелгәнгә, өендә үзе тудырган һәртөрле матурлык булганга гына түгел, нинди генә эшкә тотынса да, кулы ятып торганга, уңган-булганга шулай, диләр аның турында. Бәйләү булсынмы, тегү яисә чигүме - Гөлнурның кулы-кулга йокмый. Табигатькә, чәчәкләр дөньясына гашыйк, чигүләренә салкын кышларда җылытырлык наз һәм сөю салынган. 

-Авылыбызда үз куллары белән матурлык тудыручы, җансыз әйберләргә дә җан өрүчеләр белән, чын мәгънәсендә, горурланып яшибез, - ди Имәнлебаш авылы мәдәният йорты директоры Энҗе Әхмәтҗанова.

Шундый гүзәл, күңел җылысы салып эшләнгән камил чигешләр тудыру өчен күңелеңнең дә саф булуы кирәктер. Афәрин, кызлар! Кулларыгыздан куанып яшәгез!

Фото шәхси архивтан.