Зәйдә, талпан кадалып, 36 кеше медицина учреждениеләренә мөрәҗәгать иткән

Район үзәк дәваханәсеннән алынган мәгълүматлар буенча, районда 25 апрельгә 36 кеше талпан кадалып дәваханәгә мөрәҗәгать иткән, шуның 12се — балалар.

Бу язда талпан аеруча актив, шуңа күрә үзеңне һәм балаларны сакларга кирәк.

-Балаларга талпаннар мәктәптән кайтканда эләккән. Бигрәк тә урманга гөмбә җыярга яки ял итәргә табигать кочагына чыгучылар арасында талпан кадалу очраклары күп. Кайбер очракларда талпаннар йорт хайваннары — мәчеләр һәм этләр йоннарына ябышып, өйгә кергәннәр, — дип хәбәр итәләр район үзәк дәваханәсеннән.

Медицина хезмәткәрләре Татарстанның бөтен территориясендә диярлек энцефалит һәм боррелиоз белән зарарланган талпаннар булуын ассызыклый.

Авыру йоктыруны кисәтүдә иң ышанычлы чара — куркынычсызлык чараларын үтәү. Табигатькә чыкканда, агачлы урыннарга барганда, талпан кермәслек итеп киенергә кирәк. Ял иткәндә, үләнгә ятмаска тырышыгыз. Талпан күбрәк йомшак урыннарны: колак артын, култык асты, баш, эчнең аскы өлешен сайлый. Шуңа да, урманнан кайткач, бөтен тәнне тикшереп чыгарга кирәк. Саклануның тагын бер төре — урманга барганда, киемгә бөҗәкләрдән, шул исәптән талпаннардан да саклый торган чара сиптерү.