Зәй районында грипп һәм COVID-19 белән авыручылар саны арта: табиб киңәшләре

«Медицина учреждениесе көчәйтелгән режимда эшли, ә пациентлар арасында — олылар да, балалар да, хәтта гаиләләре белән авыручылар да бар», — ди дәваханәнең йогышлы авырулар бүлеге мөдире табиб Әнвәр Нәбиуллин.

А һәм В гриппы аеруча куркыныч тудыра, алар COVID-19га караганда авыррак уза һәм еш өзлегүләргә китерә.

Грипптан төп өзлегүләре үпкә ялкынсыну, үзәк нерв системасының зарарлану (менингит, энцефалит), лор-авырулар (отит, синусит), шулай ук сулыш юлларының авыр зарарлануына (линготрахеит, бронхи) китерергә мөмкин.

-Нигездә грипптан прививка ясатмаган кешеләр — өлкәннәр һәм балалар авырый, — дип ассызыклый Әнвәр Сәүбәнович.

Вакцинация профилактиканың төп ысулы булып кала, бигрәк тә хроник авырулары һәм иммунитеты какшаган кешеләр өчен.

Табиб авыруны йоктыру куркынычын киметү өчен берничә киңәш тә бирде: авыруны гаиләдә изоляцияләргә, бүлмәне даими җилләтергә, өслекләрне эшкәртү өчен дезинфекцияләү чараларын кулланырга. Шулай ук профилактик прививка ясату мөһим. Беренче симптомнар булганда (югары температура, хәлсезлек, йөткерү) табибка мөрәҗәгать итәргә кирәк.

Вазгыять киеренке кала, табиблар зәйлеләрне саклык чараларын үтәргә, үз-үзеңне дәвалау белән шөгыльләнмәскә һәм вакытында медицина ярдәме сорап мөрәҗәгать итәргә өнди.