Алкоголь бәйлелектән котылырга мөмкин

— Проект чаралары исерткеч эчемлекләр кулланучы ата-аналарны туры юлга бастыру һәм гаиләне саклап калу юлы белән балигъ булмаган балаларның һәм аларның ата-аналарының тормыш сыйфатын арттыруга юнәлдерелгән. «Аеклык ноктасы» программасы буенча Зәйдә 20ләп кеше, аның берсе — ир-ат, дәвалану курслары узды. Аларның барысы да хәзер эшкә урнашып, балаларын үзләре тәрбияли. 8 марттан соң тагын 4 зәйле реабилитациягә озатылачак, — ди район үзәк дәваханәсе наркологы, табиб-психиатры Илфат Салихов.

Хәзерге вакытта табиб-наркологта хроник алкоголизм диагнозы куелган 318 кеше исәптә тора. Хатын-кызлар бәйлелеккә тизрәк бирешә, аларны дәвалау авыррак. Шуңа күрә табиб алкогольле эчемлекләрне артык кулланырга киңәш итми.

26 февраль — 3 мартта РФ Сәламәтлек саклау министрлыгы наркотик матдәләр куллануны профилактикалау атналыгы уздырды. Район үзәк дәваханәсендә табиб-наркологта наркомания диагнозы куелган — 60, профилактик исәптә 124 кеше тора.

— Наркомания диагнозы куелган барлык пациентлар да — 40 яшьтән өлкән булмаган кешеләр. Гадәттә, наркоманнар озак яшәми. Бу — уйлану һәм тормышны контрольдә тоту өчен тагын бер сәбәп. Гадәттә, наркотиклар белән мавыгуга күпчелек компанияләрдә булу йогынты ясый. Наркомания бик тиз формалаша. Беренче доза шизофрениягә һәм психозларга китерергә сәләтле. Көчле рухлы кешеләр генә дәвалана ала, — ди табиб.

Профилактика буларак ул рухи юлны тәкъдим итә. «Рухи яктан нык булган кешеләр беркайчан да үзләренә һәм башкаларга зыян китермиләр», — ди.

Елына берничә тапкыр табиб мәгариф һәм яшьләр учреждениеләрендә лекцияләр укый, яшьләргә, балаларга наркотиклар, алкоголь һәм электрон тәмәке куллануның организм өчен җимергеч нәтиҗәләре турында сөйли.