Зәйдә киләсе елда яшьләр өчен психологик-педагогик үзәк булдырылачак

Ул яшь кешеләрнең, үсеп килүче буынның психологик халәтен күзәтү, кирәкле консультацияләр бирү, психологик тренинглар үткәрү урыны булачак.

- Хәзерге вакытта без әлеге үзәкне булдыру максатында планлаштыру документлары өстендә эшлибез. Тиздән әзер проект шәһәр төзелеше Советы каравына куелачак. Психологик – педагогик үзәкне Баныкин урамындагы элеккеге балалар бакчасы бинасында булдыру күздә тотыла. Моның өчен бина тулысынса төзекләндереләчәк, үзәк өчен уңайлы кабинетлар булдырылачак, - диде район башкарма комитеты җитәкчесе Эмиль Галеев.