Зәйдә балалар Тукай дөньясына сәяхәт кылды

Чарада балалар катнашты.

Балалар Тукай биографиясе, шагыйрьнең яшьли ятим калуы турында фактлар белән таныштылар. Шагыйрь язмышында аның өчен тормыш мәктәбе һәм талант бишеге булган Кырлай авылы аерым урын алып торуын белделәр. Нәкъ менә шунда, кырлар һәм урманнар арасында, Тукай үзенең эчке тавышын беренче тапкыр чын-чынлап ишетә. Халык риваятьләре аның күңеленә чишмә суы кебек керә һәм алар арасында Шүрәле образы аеруча ачык кабынып китә.

“Тукай дөньясына сәяхәт хикәя һәм сораулар белән генә чикләнмәде. Бәйрәм атмосферасын уеннар җанландырды. «Түбәтәй» уенында һәр катнашучы, баш киемен тотып, йә шигырь сөйләргә, йә биергә тиеш булды — һәм бу минутларда китапханәдә Тукай юллары да, халык көйләре дә, балаларның яңгыравыклы көлүләре дә яңгырады. Ә "музыкаль урындыкларда" күңелле киеренкелек хөкем сөрде”, - ди китапханәче Алсу Шаһабиева.

Фотолар китапханәдән.