Айдар Шәрәфиев шикәр чөгендере чәчүгә җаваплы карады

Айдар шикәр чөгендере чәчүдә әле бик күп сезон эшләмәсә дә, механизаторлык һөнәрендә 38 еллык тәҗрибәгә ия. 

“Тракторга 1990 елларда утырган идем, шуннан бирле “тимер атны” иярләүдән туктаган юк. Нигездә җир эшкәртү, сукалау эшләрен башкардым, хәзер менә чәчүдә дә катнашам. Әти өйрәткән һөнәр балачактан күңелгә кереп калды, шушы юлны сайлавыма бер дә үкенмим”, – ди Шәрәфиев.

Аның әтисе Минфаиз абый да 50 елдан артык механизатор булып эшләгән. Инде гүр иясе булса да, аның киңәшләре әле дә колак төбендә яңгырый, дип сөйли механизатор.  
Бүген Айдар Шәрәфиев – “Зәй” агрофирмасының “Аксар” бүлекчәсе алдынгы хезмәткәре. Ул үз эшенә бик җаваплы каравы белән аерылып тора, ди җитәкчеләре.
Айдар Шәрәфиев чәчүнең үз вакытында, тиз көннәрдә башкарылу мөһимлеген аңлап эш итә. Чөнки гомере авыл җирлегендә, җир эшендә үтү сәбәпле, ул авыл хуҗалыгы тармагында һәр көннең алтын бәясенә торуын яхшы аңлый. 

«Без – барлык механизаторлар да чәчкән орлыкларның тиз шытым бирүен теләп эшлибез», – ди ул.