Уртак җиңү өчен

Әзер өлгеләрне теләгән кешеләр өенә алып тегеп китерә.

Татьяна Ивановна бер ел ярым инде «Zaинск с Vами» волонтерлары төркеменә йөри. Башта маскировка челтәрләре үрсә, соңыннан эчке киемнәр кисүче киткәч, бу эшкә Татьяна апа алынган.

— Без биредә эчке киемнәр дә, бриджалар да тегәбез. Эчке киемнәрне үрелгән маскировка челтәрләре эченә салып төрәбез. Һәр челтәргә 5-6 шундый кием салына. Бирегә йөрүчеләр барысы да уртак зур эш башкаралар, — ди Татьяна Ивановна.

Һөнәре буенча Татьяна Шабаева — инженер, Зәйнең тәгәрмәчләр заводында эшләгән. «Яшь чакта үзем өчен тегә идем, менә шул шөгылем файдага булды», — ди ул. Көненә 30-40лап эчке кием кисә.

— Бриджалар өчен фланель, тыгыз тукымалар кирәк. Ә эчке киемнәр сатин, штапель, ситец, саржа, юка бәз кебек тукымалардан тегелә. Тукымаларны халык җыеп китерә. Бик зур рәхмәт әйтәсем килә, — ди Татьяна апа.

Бер ел ярым эчендә ул 7 меңнән артык эчке кием, 300ләп бриджа өлгесен кисеп әзерләгән. Әзер эчке киемнәр шулай ук «Zaинск с Vами» волонтерлары төркеме аша да озатыла.