Зәйдә юл хәрәкәте кагыйдәләрен үтәү буенча бердәм көн үткәрелде

Балалар бакчаларында тәрбияләнүчеләрдән алып өлкән сыйныф укучыларына кадәр  уку елы башында тормыш өчен мөһим булган кагыйдәләрне искә төшерделәр.

Мәктәпләрдә Бердәм юл хәрәкәте иминлеге көне  “Куркынычсызлык минутлары” һәм тематик класс сәгатьләреннән башланды, анда балалар катлаулы юл хәлләрен тикшерделәр. Яшь инспекторлар отрядлары (ЮИД) әгъзалары  иҗади якын килүләрен күрсәттеләр, агитбригада чыгышлары тәкъдим иттеләр, аларда  машина юлында дисциплинаның әһәмияте турында сөйләделәр.

Мөгаен бу көннең иң тәэсирле  вакыйгасы “Уймак кыз” балалар бакчасында үткәндер. Биредә балалар катнашында “Фликер — куркынычсызлык маякчыгы” акциясе узды. Инициативаны “Светофорик” яшь инспекторлар отряды  командасы күрсәтте. Юл хәрәкәте кагыйдәләрен яхшы белгән бу малай-кызлар  иң кечкенә җәяүлеләргә ярдәм итәргә булдылар. Алар һәр сабыйга тылсымлы бүләк — яктылыкны кире кайтара торган брелок-фликер тапшырдылар. Балаларга кием-салымга яки рюкзакка беркетелүче бу маякчыкларның  караңгыда машина йөртүчеләр өчен күренеп торуын аңлаттылар.

"Хәзер караңгы вакытта да безнең балалар йолдызчыклардан да яктырак балкыячак. Ә иң мөһиме – алар куркынычсызлыкның иминлек өчен бик кирәкле булуын аңладылар, - диләр  тәрбиячеләр.

- Мондый акцияләр шуны раслый: юл хәрәкәте кагыйдәләрен балалар үзләре пропагандалый икән, бу яшьтәшләрендә дә, өлкәннәрдә дә зур резонанс уята. Юл-транспорт травматизмын профилактикалау эше дәвам итә, чөнки һәркемнең максаты бер — үсеп килүче буынның гомерен һәм сәламәтлеген саклап калу, – дип ассызыклый “Юл куркынычсызлыгы” фонды район бүлеге башлыгы Вадим Иванов.

фото: “Юл куркынычсызлыгы” фондының район бүлегеннән