Зәйнең махсус хәрби операция ветераны «Абилимпикс» чемпионатында җиңү яулады

Анда бөтен илдән махсус хәрби операция ветераннары катнашты. Чемпионатның төп максаты – инвалидлык алган махсус хәрби операция ветераннарын комплекслы реабилитацияләү, аларга һөнәри юнәлеш бирү, эшкуар, үзмәшгульлек яки ачык хезмәт базарында уңышлы эшкә урнашу мөмкинлекләре бирә торган яңа һөнәрләр һәм белгечлекләр үзләштерүгә ярдәм итү.

Чемпионатта Зәй районын Александр Высоцкий, Руслан Фәйзрахманов һәм Евгений Иванов тәкъдим итте. Аларны «Ватанны саклаучылар» фондының  Зәй филиалы социаль координаторы Наталья Зиннурова озата барды.

Ярышлар 21 компетенция буенча узды: эретеп ябыштыру һәм машина ремонтлаудан алып, БПЛА белән идарә итү, кулинария һәм массажга кадәр. Һәркем өчен индивидуаль күнегүләр планы эшләнгән иде.

Зәйдән Александр Высоцкий “Абилимпикс”  чемпионатында “Автомобиль йөртүче” компетенциясендә беренче урынны яулады. Бу компетенциядә төрле юл шартларында автомобиль белән имин идарә итү күнекмәләре, стандарт булмаган ситуацияләрдә карарлар кабул итә һәм һөнәри бурычларны хәл итә белү бәяләнде.

Фотолар “Ватанны саклаучылар” фондыннан.