Куш-Елгада маскировка челтәрләре үрүчеләр янына “Алга” батальонында хезмәт итүче якташлары килде

Һәр челтәребезне “Бисмиллаһ” сүзеннән башлап, тиз арада махсус хәрби операция тәмамланып, егетләребез исән-имин әйләнеп кайтсыннар дип телибез.

Бүгенге көндә 227нче челтәребезне үреп бетердек. Челтәр саен күчтәнәчләр һәм хат салып җибәрәбез. Кире элемтә килгәндә, без “үрмәкүч” апаларым белән бик-бик тә шатланабыз.

Авылыбызның 7 оныгы  махсус хәрби операциягә китте. Кызганычка каршы, өчесе һәлак булды.

Кичә безнең янга хәрби зонадан кыска вакытлы ялга кайткан хәрби егет Руслан килде. Ул – Куш-Елга авылы оныгы. Бабасы Газиз абый күптән мәрхүм инде. Руслан - әнисе Әлфинур апаның горурлыгы, Денис абыйсы өчен  сөекле энесе.
Махсус хәрби операциягә Руслан  үз теләге белән китә.

Менә инде дүртенче елын Татарстанның “Алга” батальонында   хезмәт итә. Батыр, кыю, намуслы хезмәте өчен  орден-медальләр белән бүләкләнгән. Бу ялга кайтканда ул әнисенә дә бүләк алып кайткан: “Махсус хәрби операциядә катнашучының әнисенә” медале. 

Берничә тапкыр яраланып, госпитальләрдә дә ятып чыгарга туры килгән. 

Руслан белән очрашу  бик матур, җылы узды. Мул табыннар белән каршы алдык солдатыбызны. Сөйләшеп, чәйләр эчтек. 

Авылыбыз активисты Данил абый Әхәтов Русланга багышлап җырлар башкарды,  китапханәчебез  Розалия апа Хәсән Туфан шигырен  укыды. Күзләргә яшьләр килде. Һәр солдатның әти-әнисенә Аллаһ Тәгалә сабырлыклар бирсен. 

Бәрелешләр тиз арада тәмамланып, Русланыбыз да, башка егетләребез дә исән-имин әйләнеп кайтсыннар, дигән теләктә калабыз. Руслан батальонына өч маскировка челтәрләре бүләк иттек, күкрәгенә “Заинск с Вами” дигән значок та тактык. Без аны бик көтәбез, ул - безнең горурлыгыбыз.

Куш-Елга авылыннан волонтер Гүзәл Гыйльфанова.