Табиб-эндокринолог Регина Усманова: «Артык авырлыктан сакланыгыз»

Артык авырлык – косметика түгел, куркыныч фактор

Симерү, шикәр чире, йөрәк авырулары һәм гипертония ешрак дөрес тукланмау һәм аз хәрәкәтләнү нәтиҗәсе булып тора. Табиб-эндокринолог Регина Усманова ни өчен артык авырлыкны косметик проблема дип кенә санарга ярамавын, авыр эшкәртелә торган продуктлар нәрсәсе белән куркыныч һәм дөрес гадәтләр ярдәмендә сәламәтлекне ничек саклап калырга икәнен аңлата.

Заман ритмы – дөрес тукланмау сәбәбе

Белгеч сүзләренчә, тормышның ашкынучан ритмы һәм зарарлы ризыкның һәркем өчен ачык булуы кешеләрне дөрес тукланмауга ешрак этәрә. Фастфуд, татлы газлы эчемлекләр, ярымфабрикатлар һәм снеклар өлкәннәр рационының гына түгел, балалар рационының да гадәти өлешенә әверелә.

Маркетинг басымы яки көндәлек гадәт?

– «Агрессив маркетинг туклануның яңа «нормаларын» көчләп тага. Авыр эш көненнән соң күпләргә өйдә пешерүгә караганда пицца яки фри бәрәңгесен сатып алу җиңелрәк. Әгәр дә сирәк кенә була икән, бернинди куркыныч та юк, әмма зарарлы ризык көндәлек гадәткә әйләнгәч, бу котылгысыз рәвештә сәламәтлектә чагыла», – дип билгели табиб.

Гаилә – сәламәт туклану нигезе

Табибта балаларда дөрес булмаган ашау гадәтләренең кечкенәдән формалашуы аеруча борчу тудыра. Нәкъ менә гаиләдәге туклану культурасы аның һәр әгъзасы сәламәтлегенә нигез сала.

Артык авырлык нәрсәгә китерә? Физик активлык ни өчен мөһим?

Симерү җитди авырулар – артериаль гипертензия, икенче типтагы шикәр чире, югары холестерин, остеоартрит һәм йөрәк авырулары үсешенә китерергә мөмкин. Артык авырлыгы булган кешеләрнең вакытыннан алда үлү куркынычы югарырак. Моннан тыш, проблема еш кына кешенең психологик халәтендә дә чагыла – комплекслар, үз-үзенә ышанычсызлык, социаль йомыклык барлыкка килә.

Физик активлык профилактиканың аерылгысыз өлеше булып тора. Даими хәрәкәт йөрәк-кан тамырлары авырулары, икенче типтагы диабет һәм онкологиянең кайбер төрләре куркынычын киметә, нормаль авырлыкны сакларга ярдәм итә һәм психоэмоциональ халәтне яхшырта.