Торак-коммуналь хезмәтләр өчен бурычлыларга нәрсәләр яный?

Явызларча түләмәүчеләргә карата нинди санкцияләр кулланылуы турында район башкарма комитеты җитәкчесенең инфраструктура үсеше буенча урынбасары Ринат Хаҗипов сөйли.

- Торак-коммуналь хезмәтләр  өчен бурыч барлыкка килгәннән соң беренче ай дәвамында бернинди санкцияләр дә кулланылмый. Бу вакыт бурычлыларга өстәмә финанс югалтуларсыз түләүне каплау өчен бирелә.

Икенче айдан башлап, бурыч суммасына пенялар өстәлә башлый. Түләү вакыты узган беренче 90 көндә пенялар күләме көн саен бурыч суммасының 0,03 процент күләмен тәшкил итә (еллык 9,5 процент ставканың 1/300 өлеше буларак исәпләнгән). 90 көннән соң пенялар күләме көнгә 0,07 процентка кадәр арта (еллык 9,5 процент ставканың 1/130 өлеше буларак исәпләнгән).

Өченче айдан идарәче компания катгыйрак чаралар кулланыр мөмкин, шул исәптән коммуналь хезмәтләр күрсәтүне чикләүне дә кертеп. Хезмәт күрсәтүләрне чикләү алдыннан бурычлы бу хакта  түләү квитанциясе яки заказлы хат аша хәбәр ителергә тиеш. Хәбәрнамә әҗәтне каплау өчен 20 көн бирә.

Әгәр бурычлы кеше йөкләмәләрне игътибарсыз калдыруын дәвам итсә, идарәче компания аны судка бирергә хокуклы. Искны откан очракта, суд бурычлыны әҗәтен түләргә мәҗбүр итә ала.  Банктагы счетлардан акчаларны автомат рәвештә салдыру, милеккә (мәсәлән, автомобильгә) арест салу, аннан соң аны сатуга кую, хезмәт хакының яисә пенсиянең бер өлешен тотып калу, бурычны тулысынча түләп бетергәнче чит илгә чыгуны тыю кебек чаралар кулланыла.

Күңелсез нәтиҗәләрне булдырмас өчен торак-коммуналь хезмәтләргә  вакытында түләү мөһим. Әгәр финанс яктан кыенлыклар килеп чыкса, бурычны бүлеп түләү яки реструктуризацияләү мөмкинлеге турында идарәче компаниягә мөрәҗәгать итәргә киңәш ителә.

Бурычны вакытында түләү яки идарәче компаниягә ярдәм сорап мөрәҗәгать итү санкцияләрдән качарга һәм яшәү шартларын уңайлы итеп сакларга ярдәм итәчәк.