Зәйлеләр республика Питрау бәйрәмендә катнашты

Алар арасында – Зәй район мәдәният йортының «Җиләк» халык керәшен коллективы да бар. Җиләклеләр  яраткан халык   җырларын башкарды, тамашачыларга гореф-гадәтләрнең чын бәйрәмен бүләк итте. Меңләгән кунаклар аларга кушылып җырлады һәм көчле алкышлар белән рәхмәт белдерде.

Шулай ук безнең район мәдәният йорты хезмәткәрләре Питрау бәйрәмендә керәшен ишегалдын оештырды.

-Безнең район мәдәният йорты  хезмәткәрләре оештырган керәшен ишегалды аерым игътибарга лаек. «Туганайлар» этно-авылында без борынгы керәшен тормышының чын бер почмагын булдырдык. Кунакларга традицион тормыш атмосферасына чумарга, һөнәрләр һәм уникаль мәдәният белән танышырга мөмкин иде, - ди район мәдәният йортының сәнгать җитәкчесе Зинаида Владимирова.

Бәйрәм 50 000гә якын кунакны җыйган бөек тантана булды. Чараның масштабы шаккатыргыч: Татарстанның 20 районыннан һәм шәһәреннән 50дән артык иҗат коллективы, шулай ук Башкортстан, Удмуртия, Самара һәм Чиләбе өлкәләреннән делегацияләр катнашты. Нәкъ менә мондый чаралар  бердәмлек һәм туган мәдәнияткә мәхәббәт бүләк итә.

Фотолар район мәдәният йортыннан.