Зәйдә хәйрия марафоны башланды

“Без бердәм халык”. Шул исемдә районда игелекле чара башланып китте. Марафон буенча җыелган акчалар махсус хәрби операциядәге якташларга җибәреләчәк.
Зәйнең барлык оешма-предприятиеләре, идарәләр дә читтә калмаячак. Аны “Зәй җылысы” хәйрия фонды белән яшьләр эшләре идарәсе оештыра. Махсус тартма һәр оешмага тапшырылды. Зәй ГРЭСы да бу эштән читтә калмады. Бүген исә оешма хезмәткәрләренә әлеге марафон турында аңлаттылар.

Оешма-предприятиеләр генә түгел, Зәйнең эре сәүдә нокталары да хәйрия марафонына бик теләп кушылды. Аеруча кеше күп йөри торган кибеткә дә ярдәм җыелачак махсус тартма куелды.

10 нчы апрельда башланган марафон 19ына кадәр дәвам итәчәк. Илдәге вәзгыятькә, СВОда Зәй егетләренә битараф булмаган райондашларыбызны игелекле гамәлгә кушыла ала. Киләсе атнаның чәршәмбесендә марафонга нәтиҗә ясалачак. Шулай ук Энергетик мәдәният сарае каршындагы мәйданда хәйрия ярминкәсе һәм концерт оештырылачак.