Зәйдә ишегаллары төзекләндерелә

Зәйнең Җиңү проспекты 1/08 йорты ишегалдында ремонт эшләре бара. Ул “Безнең ишегалды” республика программасы буенча башкарыла. Бүгенге көндә биредә подрядчылар элекке тротуарларны ватып, яңаларын җәюгә әзерлиләр.

Алга таба балалар мәйданчыгын яңарту эше планлаштырылган. Аерым алганда, мәйданчыкта балалар иминлеге өчен исәпләнгән махсус комлыклар, яңа уен комплекслары булдырылачак. Йортлар арасындагы юллар янгын куркынычсызлыгын исәпкә алып киңәйтелә, ди төзүчеләр.
1\04 йорты ишегалдында да төзекләндерү эшләре бара. Биредә элекке спорт мәйданчыгын яңарту каралган. Хәзер техника тротуарның бетон өслеген ватып, яңа асфальт җәю өчен әзерли. План буенча подъездга керү өлешен, чүп түгү урыннарын төзекләндерү алып барылачак.