Зәйдә Виктор Яровицынның шәхси күргәзмәсе ачылды

 Бу көнне китапханә  кунаклары сәнгать һәм музыка атмосферасына чумдылар. Есения Соловьева, балалар музыка мәктәбе педагоглары чыгышларын карадылар, рәссам сөйләмен тыңлап хозурландылар.  Виктор Александровичны котларга килгән хөрмәтле кунаклар арасында “Водоканал” оешмасы җитәкчесе  Сергей Федоров, җирле рәссамнар Равил Әхәтов һәм Фазыл Шиапов бар иде.

Ачылу тантанасында Виктор Александрович кунаклар белән үзенең иҗади юлы һәм картиналар тудыру тарихы белән уртаклашты. Аның һәр әсәрендә нечкә лиризм һәм туган җиргә тирән мәхәббәт сизелә. Рәссам пейзажларга һәм авыл мотивларына аерым игътибар бирә, аның картиналарына баккан һәркем ирексездән туган авылын  сагыну хисләренә чума.

Күргәзмә картиналар белән генә чикләнмәде, биредә шулай ук агач эшләнмәләр дә урын алган. Виктор Александрович үзенең эшләрендә  агачның табигый матурлыгын сакларга омтылып иҗат иткән.

Виктор Яровицын 1946 елның 13 сентябрендә Иваново өлкәсе  Кохма шәһәрендә туган. Аның балачагы сугыштан соңгы катлаулы елларга туры килә. Гомуми белем бирү мәктәбенең сигезенче сыйныфын тәмамлагач, ул эшкә урнашырга мәҗбүр була һәм укуын эшче яшьләр мәктәбендә дәвам итә. 10 нчы сыйныфны тәмамлагач, Иваново энергетика институтына укырга керә. Институтны тәмамлагач, Виктор Александрович үзенең һөнәри эшчәнлеген Иваново җылылык энергетика цехында  башлый. 
 

Алга таба аны Зәй ГРЭСына җибәрәләр, анда ул 26 елдан артык өлкән мастер булып эшли.  Үзенең төп эшеннән тыш, Виктор Александрович Зәйнең мәдәни тормышында да актив катнаша. Ул үзешчән иҗатта һәм төрле күргәзмәләрдә катнаша. 1983 елда халык иҗаты өлкәсендәге казанышлары өчен аңа Бөтенсоюз халык иҗаты смотры лауреаты исеме бирелә.

Лаеклы ялга чыккач, Виктор Александрович үзенең хезмәт эшчәнлеген дәвам итә, ул «Водоканал» предприятиесенә урнаша һәм бүгенге көнгә кадәр (24 елдан артык)  биредә  эшли. Үзенең 80 яшендә Виктор Александрович күтәренке рухта яши һәм актив тормыш рәвеше алып бара. Ул картиналар иҗат итүен, күргәзмәләрдә катнашуын дәвам итә. 

Бу көнне китапханәдәге атмосфера ихласлык һәм җылылык белән тулы иде. Рәссамның эшләре тамашачыларда зур кызыксыну һәм соклану уятты. Кунаклар әсәрләр белән озак таныштылар һәм тәэсирләре белән алмаштылар.

фотолар үзәк китапханәдән.