Татарстанда “Укытучы” фильмы төшерелә башлады

Проект ике илнең иҗат коллективлары катнашында тормышка ашырыла һәм Үзбәкстан белән Татарстан арасында мәдәни һәм гуманитар хезмәттәшлекне үстерүгә мөһим өлеш буларак карала. Фильм киң аудиториягә юнәлдерелгән һәм тамашачыларны төрки һәм Ислам дөньясының уртак тарихы һәм рухи мирасы белән таныштыруга юнәлдерелгән.

Картинаның генераль продюсеры - Миләүшә Айтуганова (Татарстан), Үзбәкстан продюсеры - Абдрауф Жураев.  Яшь Шиһабетдин Мәрҗани ролен Кариев театры артисты Булат Гатауллин башкара. Фильмның режиссеры - Татарстаннан Рамил Төхвәтуллин, Үзбәкстаннан Илһам Мөхәммәдиброхимов. Сценарий авторлары - Салават Юзеев һәм Шойим Бутаев.

Фильмның сюжеты Мәрҗанинең балачак елларын, аның XIX гасырда ислам фәненең һәм мәдәниятенең төп үзәкләре булган Бохара һәм Сәмәркандта галим буларак белем алу һәм формалашу чорын үз эченә ала.  Үзбәкстанда төшерү процессы декабрьдә Бохарадагы тарихи "Мир-и-Араб" мәдрәсәсе территориясендә старт алган, анда үз вакытында Шиһабетдин Мәрҗани укыган. Мәдрәсәдә 2019 елда галимнең тууына 200 ел тулу уңаеннан куелган истәлекле исем тактасы сакланган.

Татарстанда Мәрҗанинең яшьлеге турындагы «Укытучы» фильмы күренешләрен төшерү 2026 елның 21 гыйнварында башланды. Тарихи яктан ул чорга охшаш булган берничә локация сайланган. Шуларның берсе - Татарстан Республикасы Яшел Үзән  районының Исак авылындагы «Татар Авылы» этносаласы.  Икенчесе - Шәриф Камалның музей-йорты.

Иҗат төркеме  ассызыклаганча, “Укытучы" — биографик драма гына түгел, ә белемнең кыйммәте, остазга хөрмәт һәм рухи эзләнү, хәзерге җәмгыять өчен дә актуаль булган фильм. Тасма киң халыкара аудиториягә исәпләнгән.

«Укытучы» фильмының премьерасы 2026 елның сентябрь башында «Алтын мөнбәр» Казан халыкара кинофестивале кысаларында күрсәтелергә планлаштырыла. Проект Үзбәкстан белән Татарстан арасында мәдәни-гуманитар хезмәттәшлекне үстерүгә зур өлеш кертер дип көтелә.

Фотолар "Татар-кино" матбугат хезмәтеннән.