Акварель техникасы серләре

Эльвира Исанбердина – танылган рәссам, Татарстан Республикасы һәм Удмуртия Республикасы Рәссамнар берлеге әгъзасы.

Күргәзмәне ачу тантанасында рәссамның остазы, Волгоградтан килгән мәшһүр акварельче Павел Пугачев, Зәй рәссамнары Сергей Дмитриев, Виктор Хрулев, Эркин Пулатов, агачтан эшләнмәләр ясау остасы Равил Әхәтов һәм Чаллы рәссамы Ольга Новожилова катнашты.

“Залдагы атмосфера иҗади рух һәм дустанә аралашу җылысы белән тулы иде. Эльвира Эриковна осталык серләре белән уртаклашты һәм үзенең картиналарындагы сюжетларның – шәһәрнең кыс-ка гына күренешләреннән алып тирән фәлсәфи образларга кадәр ничек тууы турында сөйләде”, – ди музейның өлкән фәнни хезмәткәре Светлана Долгова.

Павел Пугачев, үз укучысының уңышларын күзәтеп, аның һөнәри үсешен һәм гади әйберләрдә дә матурлыкны күрә белү сәләтен билгеләп үтте. Күргәзмәнең кульминациясе булып «Укчы» картинасын интерактив рәвештә «терелтү» һәм мастер-класслар сериясе торды. Эльвира Эриковна җитәкчелегендә кунаклар кәҗә рәсемен ясап карадылар.

Үз чиратында, Россия Рәссамнар берлеге һәм Халыкара акварель җәмгыяте әгъзасы, күп кенә халыкара, бөтенроссия һәм төбәк күргәзмәләрендә катнашучы Павел Пугачев килгән кунакларны Зәй музееның этюды белән сөендерде. Ул аны «Персиклы кыз» дип атады. Бу әсәр рәссам белән музей киңлеге арасындагы үзенчәлекле иҗади диалогка әйләнеп, бинаның архитектур үзенчәлеген ассызыклады.

«Акварель попурриы» күргәзмәсе сәнгать сөючеләр өчен чын бүләк булды, ул зәйлеләргә югары осталыкка кагылырга һәм авторның ихласлыгыннан илһам алырга мөмкинлек бирә. Күргәзмә бер ай дәвамында эшләячәк.

фото музейдан