Эмиль Галеев: «Агымдагы ел юл хәрәкәте өлкәсендә районда авыр башланды»

Анда 20 гыйнварда район территориясендәге юлда килеп чыккан, кеше үлеменә, балаларның авыр тән җәрәхәтләре алуына китергән аяныч һәлакәт хакында сөйләштеләр, мондый хәлләргә юл куймау өчен мөһим кискен чаралар турында сүз барды. 
Соңгы айда районыбыз юлларында аварияләр саны узган елның шушы чоры белән чагыштырганда 15% ка арткан. Аварияләрнең төп сәбәпләре –  тизлекне арттыру, дистанцияне үтәмәү һәм маневрлар ясау кагыйдәләрен бозу. Бу чорда булган юл-транспорт һәлакәтләре аяныч нәтиҗәләргә китерде.

«Агымдагы ел башы районда үтә куркыныч юл-транспорт һәлакәте килеп чыгу сәбәпле, юл хәрәкәте өлкәсендә бик авыр башланды. 20 гыйнварда Чаллы-Зәй-Әлмәт юлының Туңылҗа авылы янында аеруча авыр юл-транспорт һәлакәте булды, аның нәтиҗәсендә алты кеше, шул исәптән өч балигъ булмаган бала зыян күрде. Кызганычка каршы, 17 яшьлек бер бала авария урынында һәлак булды, ә өч һәм унбер яшьлек ике бала авыр җәрәхәтләр белән хастаханәдә ята. Һәлакәтнең сәбәпләре әлегә ачыклана. Тикшерү дәвам итә, һәм инцидентның барлык шартлары җентекләп өйрәнеләчәк. Бу фаҗига юл хәрәкәте кагыйдәләрен үтәүнең һәм юлларда куркынычсызлыкны арттыруның мөһимлеген тагын бер кат ассызыклый. Әлеге хәлне исәпкә алып, кичекмәстән район юлларында тизлек режимы үтәлешенә контрольне көчәйтү чараларын күрергә, шулай ук машина йөртүчеләрнең катлаулы һава шартларында юлда үз-үзеңне тоту кагыйдәләре турында хәбәрдарлыгын арттыру буенча өстәмә профилактик эш алып барырга кирәк дип саныйбыз. Һәлакәт булган урында шәхсән булып, андагы җәрәхәтләр алган балаларның хәле әле дә күз алдымда тора. Мондый авыр хәлләрне булдырмау өчен юл кагыйдәләрен үтәүдә бик тә төгәл, игътибарлы булу кирәк», — диде комиссия рәисе Эмиль Галеев.

Районның дәүләт автоинспекциясе башлыгы Рамил Гарифуллин белдерүенчә, гыйнвар ае башланганнан алып  Зәй районы юлларында инде 31 юл-транспорт һәлакәте теркәлгән. Аларның икесе кешеләр тән җәрәхәтләре алу белән бәйле һәлакәтләр, бер кеше үлде, 6 кеше җәрәхәтләнде. Узган елның шушы чоры белән чагыштырганда һәлакәтләр саны 4кә артык булса да, 2024 ел башында кешеләр яраланмаган. 

— Юл-транспорт һәлакәтләренең бер сәбәбе — каршы як полосага чыгу. Бу кагыйдә бозуда иң куркынычларның берсе санала, чөнки ул иң авыр нәтиҗәләргә китерә. Мәсәлән, 20 гыйнварда булган авариядә дә шундый кагыйдә бозу билгеле. Анда «МАН TGS» йөк автомобиле йөртүчесе булган Үзбәкстан кешесе, Зәй ягыннан Яр Чаллы шәһәре юнәлешендә хәрәкәт иткәндә, юл һәм метеорологик шартларны исәпкә алмаган, каршы хәрәкәт өчен билгеләнгән юл ягына чыккан һәм бу юнәлештә хәрәкәт итүче LADA KALINA автомобиле белән бәрелешкән. Авария нәтиҗәсендә без җиңел машина пассажиры булган 17 яшьлек Зәй егетен югалттык. Машина йөртүче күп төрле сөяк сынулар белән һәм тагын бер пассажир баш өлеше яраланып Түбән Кама дәваханәсенә озатылды. Ә ике бала — берсе унбер яшьлек, икенчесе өч яшьлекләр авыр тән җәрәхәтләре белән Чаллының ашыгыч ярдәм дәваханәсенә җибәрелделәр. Әлеге балалар махсус каешлар белән эләктерелү, автокреслода утыртылган булу сәбәпле исән калганнар. Бүгенге көндә иң җитди проблемаларның берсе булып балаларны транспортта имин йөртү мәсьәләсе кала. Еш кына балалар юл-транспорт һәлакәтендә аларның ата-аналары һәм башка затлар тарафыннан балаларны автомобильдә йөртү кагыйдәләрен үтәмәү аркасында җәрәхәтләр ала. Күп тапкырлар, массакүләм мәгълүмат чараларында һәм «Бала-төп пассажир» профилактик чаралары вакытында без юкка гына, 12 яшькә кадәрге балаларны автомобиль салоннарында бары тик балаларны тотып торучы җайланмаларда — куркынычсызлык каешын тиешенчә эләктергән автокреслоларда гына йөртергә кирәк дип кисәтмибез. Ата-аналар арасында әлегә кадәр балалар автокреслоларына игътибар итмәүчеләр бар, балаларны йөртү кагыйдәләрен бозган өчен быел гына да 4 машина йөртүче административ җаваплылыкка тартылды инде", — ди инспекция башлыгы. 

Комиссия утырышында мәгариф оешмаларында профилактик кисәтү чаралары буенча эш барышы, кышкы юлларның чистартылу дәрәҗәсе, юл билгеләренең тиешле урыннарга урнаштырылуы, исерек килеш руль артына утыручылар хакында да сөйләштеләр. Инде салмыш килеш машинага утыручы 7 шофер тоткарланган. 

Эмиль Эдуардович юл иминлегенә кагылышлы һәр мәсьәләгә үтә җитди карарга кушты, тикшерүләрне катгыйландыру мөһимлеген ассызыклады.