Сарсаз-Баграж мәктәбе укучылары хәрбиләргә окоп шәмнәре дә ясыйлар, хатлар да язалар

Укучылар педагоглары, мәктәп хезмәткәрләре белән бергәләп алынды бу игелекле эшкә. Эш башлаганнан алып бүгенге көнгә кадәр 2300ләп окоп шәме ясаганнар. Аларны җирлектән махсус хәрби операциядә катнашучы ир-егетләргә, шулай ук якташларга озаталар. Окоп шәмнәре салынган тартмаларга укучылар җылы эчтәлекле хатлар да язып салалар.

«Өчпочмаклы хатларда балалар солдатларга чын күңелдән рәхмәтләрен белдерәләр. Махсус хәрби операциядә хезмәт итүче егетләребезнең күңелләренә әлеге хатлар җылылык өстәр дип ышанабыз. Без аларның һәрберсе белән горурланабыз һәм аларның исән-сау әйләнеп кайтуларын теләп калабыз», — ди мәктәп директоры Валентин Мартемьянов.

Махсус хәрби операциядә хезмәт итүче егетләребез туган якларыннан һәрдаим җылы хәбәр көтәләр. Балалар тарафыннан язылган хатлар аларның күңелләренә аеруча җылылык өсти. Мәктәп укучылары алар кулы белән ясалган окоп шәмнәре игелек уты, туган як җылысы символы буларак, һәр солдатны җылытыр дип өметләнәләр.

Фотолар мәктәптән.