Зәйнең «Тату гаилә» бакчасы балалары Айболитта кунакта булдылар

Хайваннар дөньясы бик кызыклы, ә йорт хайваннары тәрбиянең мөһим факторы булып тора. Шуны күз алдында тотып, «Тату гаилә» бакчасының «Якты коңгыз» һәм «Кояшкай» төркеме балалары өчен ветеринария клиникасына экскурсия оештырылды. Экскурсиядә Кесси исемле мәче дә катнашты.

Балалар клиникада ветеринария табибы һөнәре һәм заманча ветеринария клиникасы эше белән таныштылар. Алар авыр, әмма бик кызыклы һөнәр дөньясына чумдылар. Ветеринария табибының кем икәнен һәм аның нәрсә белән шөгыльләнгәнен белделәр.

"Балаларның сорауларына ветеринария табиблары алар телендә аңлаешлы итеп җавап бирделәр. Балалар үзләре дә табиб ролендә булдылар, "Кесси«ның фонендоскоп аша йөрәк тибешен тыңладылар, авырлыгын үлчәделәр, шулай ук файдалы витаминнар белән сыйладылар. «Кесси» тулысынча сәламәт булып чыкты, бу балаларны һәм мәче хуҗасын бик сөендерде. Балаларга экскурсия бик ошады, алар үзләре өчен күп яңалыклар алдылар«, — ди «Тату гаилә» бакчасы мөдире Мария Петрякова.

Фотолар бакчадан.