Зәйнең яшь ватанпәрвәрләре, хезмәт нигезләрендә тәрбияләнүчеләр өчен яңа мөмкинлекләр ачыла

«Яшьләр һәм балалар» илкүләм  проектын гамәлгә ашыру кысаларында Зәй  районының авыл мәктәпләрендә «Ватанны саклау, куркынычсызлык» һәм «Хезмәт (технология)» предметлары буенча матди базаны яңарту башланды.
Әлеге фәннәр буенча махсус кабинетлар, укучыларга гадәттән тыш хәлләрдә үз-үзеңне тоту кагыйдәләре, беренче ярдәм күрсәтү һәм куркыныч хәлләрне профилактикалау турында белемнәрен яхшырак үзләштерергә мөмкинлек бирә торган техник чаралар һәм җайланмалар белән җиһазландырыла. Махсус җиһазларны куллану укучыларга экстрен шартларда исән калу һәм реакция ясау күнекмәләрен тизрәк үзләштерергә ярдәм итә. Хезмәт дәресләрендә укучылар агач һәм металл белән эшләү буенча яңа практик биремнәрне үтәү мөмкинлеге алдылар, үз проектларын булдырдылар, идеяләрен тормышка ашырдылар һәм үзләренең уйлап табучанлыкларын күрсәттеләр.
"Без яңартылган кабинетларда укыту барышында Ватаныбызга мәхәббәтне һәм тарихи кыйммәтләргә хөрмәтне ныгыта торган патриотик тәрбиягә аерым игътибар бирәбез. Шуның нәтиҗәсендә укучылар махсус хәрби операциядә катнашучыларга ярдәм итү акцияләрендә актив катнашалар, җаваплылык һәм гражданлык позициясе җитди формалаша,- дип ассызыклый Сарсаз-Баграж мәктәбе директоры Валерий Мартемьянов. Шулай итеп, хәзерге белем бирү шартлары яшьләрне киләчәктәге катлаулы мәсьәләләрне хәл итүгә әзерләп, аларның һәрьяклап үсешенә ярдәм итә.